Die Modimolle-parkrun is ‘n baie gewilde tydverdryf op Saterdae vir inwoners van alle ouderdomme. Die afgelope Jeug- en Vadersdag-naweek is die 110de wedloop by die Koro Creek-gholflandgoed in Modimolle gehou. Altesame 71 deelnemers het die 5 km-afstand gehardloop of gestap. Daar was 17 vrywilligers wat as baanbeamptes opgetree het. Vir Megan van der Merwe was dit ‘n persoonlike prestasie om haar 50ste parkrun te voltooi. Sy het in die afdeling vir 11-14 jaar deelgeneem. Megan se kleinsus, Kayla (o.10), het ook al 50 parkruns voltooi. Hul ma, Helen van der Merwe, het al 59 wedlope saam met die Modimolle-parkrun-klub voltooi. Deelnemers registreer aanlyn vir die Modimolle-parkruns wat elke Saterdag om 07:00 gehou word. Belangstellendes kan vir Annette van Dyk bel by tel. 072 129 7585 vir meer inligting.
Laerskool Thabazimbi is baie trots op hul gedugte o.11-rugbyspan wat op Woensdag 15 Junie as Limpopo-wenners in die provinsiale liga uitgetree het. Thabazimbi het in die semifinale ronde met Laerskool Tzaneen afgereken met ’n telling van 25-14 om hul plek in die finaal te bespreek. Die finale wedstryd teen Laerskool Pietersburg Noord was senutergend vir afrigters, spelers en ondersteuners, maar Thabazimbi kon daarin slaag om Noordskool met 20-19 te klop. Op die foto is die span as die nuwe Limpopo-wenners vir 2022.Hierdie ywerige gimnaste van die Kruiskrag-gimnastiekklub in Bela-Bela het goeie punte behaal tydens die onlangse gimnastiekkompetisie by die Marshall Gimnastiek-akademie in Mokopane. Voor is Mioné Smit (brons) en Christi Paul (brons). In die middel is Johan Brits (brons) en Frans Brits (brons). Agter staan Henk Rhodes (brons) en Dirk Brits (brons).Gimnaste van die Kruiskrag-gimnastiekklub in Bela-Bela het op Saterdag 11 Junie ’n kompetisie by die Marshall Gimnastiek-akademie in Mokopane bygewoon. Die kompetisie is bemark as ’n Bosveld ope-gimnastiekdag waar verskeie klubs van regoor die provinsie deelgeneem het. Op die foto is Mia-Marie Barnard (brons) en Sinzé Oosthuizen (brons). In die middel is Lienke Jansen van Nieuwenhuizen (brons) en Lienke Strydom (brons). Agter staan Kayla Berrange (goud), Regard van Rooyen (brons), Marko van Rooyen (brons), Divan Nel (silwer) en Ané Snyman (goud).