Goeie sportmanskap het die afgelope naweek hoogty by Hoërskool Warmbad gevier. Die Warries het teen Hoërskool Ellisras meegeding waarna die Kwagga-dorpsrugbyspan teen die span van korrektiewe dienste kragte gemeet het. Die Warries se o.16-span het gelykop gespeel met ’n telling van 12 elk en die Warries se eerstespan het ’n wegholoorwinning van 62-0 behaal. Die Kwaggas se tweedespan het later die naweek korrektiewe dienste se span met 12-0 gewen en die eerste span het in naelbytwedstryd met 35-24 gewen. Op die foto is die Kwaggaspan ná hul sege.
Vyf netbalspelers van Hoërskool Nylstroom is gekies om deel te wees van die Limpopo-netbalspanne. Anika Holtzhausen en Leomai Meecham is verkies as reserwes vir die o.18-span. Sybrie Van der Merwe is deel van die o.17-span, Tariro Nkosi van die o.16-span en Mieke Mienie is deel van die o.15-span.Die Sonskyn-duiweklub van Bela-Bela gaan, in samewerking met Hoërskool Warmbad, ’n fondsinsameling hou om die skool ’n finansiële inspuiting te gee. Mense kan ’n kaartjie teen R100 koop en die kans staan om ’n gratis jagpakket te wen. Daar is ’n koedoebul, rooibok, vark en blouwildebees op die spel. Die gr. 10-, 11- en 12-leerders verkoop tans die kaartjies. Die klas wat die meeste verkoop, ontvang ’n kontantprys van R4ؘ 000 en die leerder wat die meeste verkoop ontvang R2 000. Vir navrae kan mense vir Paul Bester, voorsitter van die duiweklub, bel by tel. 071 388 5412. Op die foto is Bester saam met Karen Vorster, waarnemende skoolhoof, en Van Reenen Cloete, atletiekafrigter en sekretaris van die duiweklub, tydens die oorhandiging van die kaartjies.Vatso! ’n Baie suksesvolle bulletjierugbydag is op Saterdag 22 April by Laerskool Warmbad aangebied. Laerskole Thabazimbi, Nylstroom, Warmbad, Eenheid, Vaalwater, Marble Hall, asook Julian Müller en Klein Pikkewyn-kleuterskool het aan die byeenkoms deelgeneem. Op die foto is Divan Nel van die Warries met die bal in die hand tydens die naweek se wedstryd teen Thabazimbi. Foto: Herman Steyn
You can read the full story on our App. Download it here.
