Frikkie-atlete presteer goed in Brits
Die atlete van Hoërskool Frikkie Meyer het op Vrydag 28 Januarie kragte gemeet teen vyf topskole tydens hul eerste vriendskaplike atletiekbyeenkoms van die jaar.
![](https://images.caxton.co.za/wp-content/uploads/sites/134/2022/02/THABA-Frikkies-2-10-780x470.jpg)
Ná ’n besondere suksesvolle interhuisbyeenkoms, het die Frikkies se atletiekspan na Hoërskool Brits gereis waar hulle teen atlete van Hoërskool Brits, Hoërskool Bergsig, Hoërskool Akasia, Hoërskool Wonderboom en Curro Heuwelkruin meegeding het.
Die Frikkies het die eersteplekke ingeryg. Die meisies wat gewen het, is Esmarie Pienaar (o.14-verspring en -hoogspring), Carli Fouche (o.14-diskus), Pearl Simanga (o.16-400 m hekkies), Niché Rohrs (o.16-gewigstoot), Lené Lategan (o.17-spiesgooi), Chenell Fouché (o.17-diskus), Cara Pieterse (o.19-gewigstoot en -diskus) en Jamie Swanepoel (o.19-verspring).
Die seuns wat eersteplekke behaal het, is Amo Matheboge (o.14-300 m hekkies), Ziyanda Ngubane (o.15-100 m hekkies), Lourens Pieterse (o.15-diskus en -gewigstoot), Eric Coetzee (o.16-gewigstoot) en Luan von Wielligh (o.19-diskus).
![](https://images.caxton.co.za/wp-content/uploads/sites/134/2022/02/THABA-Frikkies-3-9-533x800.jpg)
Die seuns se o.16-aflosspan het ook vir hul teenstaanders hakke gewys.
Atlete wat 800 en meer punte op die Absa-tabel aangeteken het, was Cara Pieterse (815 in diskus met ’n rekordafstand van 36,50 m), Chenell Fouché (830 punte in diskus met ’n afstand van 35,61 m) en Lourens Pieterse (814 punte in gewigstoot met ’n afstand van 14,47 m). Hy het ook dié sukses voortgesit in die diskus-item en met ’n afstand van 54,04 m, 888 punte aangeteken.
Lourens en Cara Pieterse het albei byeenkomsrekords in diskus opgestel.
Hoërskool Frikkie Meyer bedank al die atlete, afrigters, spanbestuurders en ouers wat gehelp het om dié byeenkoms vir die Frikkies moontlik te maak.
![](https://images.caxton.co.za/wp-content/uploads/sites/134/2022/02/THABA-Frik1-9-800x532.jpg)