Hoërskool Nylstroom se tennisspanne het op Donderdag 2 September teen die spanne van Hoërskool Ellisras in Lephalale gespeel. Die Nylie-seuns tennisspanne het met 43-7 potte gewen en die Nylie-meisies het hul opponente met 47-3 potte geklop. Hesmé Holthausen (bo), gr. 8-leerder van Hoërskool Nylstroom, het haar enkelspel gewen en in die dubbelspel saam met haar sussie Anika gewys dat hulle ’n gedugte span is. Heinrich Steffen (onder), die Nylies se no. 2-speler het ook sy enkel- en dubbelspel gewen.
Foto’s: Herman Steyn
Die o.15-krieketspan van Hoërskool Nylstroom het op Woensdag 1 September teen die span van Hoërskool Warmbad te staan gekom. Die Warries het 99 lopies aangeteken voordat hul kolwers almal uitgeboul is. Die Nylies het met slegs twee paaltjies die telling behaal. Wihan Bezuidenhout van Hoërskool Nylstroom (bo) het ’n sleutelrol gespeel in sy span se oorwinning. Die aanvallende boulwerk van Deon Scholtz van Hoërskool Warmbad (onder) het die Nylie-kolwers met tye laat bontstaan. Foto’s: Herman Steyn
Hoërskool Hans Strijdom in Mookgophong se o.15-krieketspan het hierdie seisoen só goed presteer dat Riaan Botha, hoofseun van 1991 en sakeman van die dorp, die span se spandrag geborg het. Op die foto is Riaan Botha (links), Marius van den Berg (afrigter) langs hom en heel regs op die foto is die ander afrigter, Johan Pitout. Agter saam met die seuns staan Juan Kotze (afrigter).Hierdie rugbymanne van Hoërskool Hans Strijdom in Mookgophong is in drie verskillende spanne opge-neem nadat hulle uitgeblink het tydens die proewe. Kamo Sethosa is vir die Grant Khomo-span gekies, André de Nysschen het sy plek in die Noordvaal o.16-span oopgespeel en Thato Gololo is gekies vir die Akademieweek-span. Weens die Covid-19-inperkings sal die spelers ongelukkig nie aan die toernooie deelneem nie. Hulle kry egter erkenning vir die onderskeie spanne waarvoor hul gekies is.
