Oud-Warrie skitter by die Griquas
’n Kleintyddroom om vir ’n provinsiale rugbyspan uit te draf het vir oud-Warrie HJ Luüs waar geword.
Luüs draf deesdae vir die Tafel Lager Griquas-rugbyspan uit. Hy studeer deur afstandsonderrig vir sy LLB-graad aan die Universiteit van Stellenbosch.
Hy het in ’n gesprek aan Die Pos gesê die maandelange grendeltydperk was nie goed vir sy loopbaan nie.
“Ek het baie doelwitte gehad, maar Covid-19 het baie frustrasies veroorsaak en ek was met tye baie ongemotiveerd.”
“Ek het nog aan die begin van die jaar as haker vir die Maties uitgedraf, maar ná slegs vyf wedstryde is die Varsity-bekertoernooi gekanselleer toe die Covid-19-pandemie ons land getref het. Maties was op daardie stadium bo-aan die punteleer en was die gunsteling om vir die derde agtereenvolgende jaar die toernooi te wen. Dit sou ’n mylpaal wees om deel van dié Maties-wenspan te wees.”
Luüs het gesê hy het die geleentheid aangegryp om sedert Junie vir die Griquas-rugbyspan in Kimberley as haker uit te draf.
“Universiteitsrugby het vir my ’n goeie grondslag gelê, maar professionele rugby is taaier en ’n mens is elke dag besig om aan tegniek, fiksheid of in die gimnasium te werk. Provinsiale spelers het ook ander verpligtinge wat die program verder vol maak. Ek geniet dit ontsettend baie.”
Luüs het sy debuut op die professionele front tydens vanjaar se Super Rugby Unlocked-toernooi gemaak.
Die Blou Bulle was die wenners van dié liga waarin sewe spanne meegeding het en die Griquas het laaste geëindig.
“Ons het baie getroue en lojale ondersteuners. Hulle glo in die span en weet ons het letterlik teen Springbokspelers uitgedraf. Ons span het by meer as een geleentheid tot halftyd voorgeloop en in drie van ons wedstryde is die bordjies amper verhang. Ons span het sonder twyfel verbeter en die manne is nou gefokus.”
Luüs en sy spanmaats neem tans deel aan die Carling Curriebeker-toernooi. Die span het nog twee wedstryde vir die jaar oor teen die Vodacom Bulls en die DHL Westelike Provinsie.
“Die weerlig het ons onlangse wedstryd teen die Leeus effe gekniehalter toe die wedstryd om veiligheidsredes gestaak is. Die wedstryd teen die Phakisa Pumas was nogal ’n harde, maar lekker wedstryd.”
Luüs het gesê al het die seisoen teen ’n slakkepas vir alle rugbyspelers begin, het hulle nou gevorder en is hulle onstuitbaar.
“Ek het nog geen beserings opgedoen nie. Ons spanbestuur sien baie goed om na ons welstand en sorg dat beserings behandel word en spelers die regte rehabilitasie ondergaan. Toe ek die eerste keer by die Griquas aangekom het kon ek voel hoe elke persoon jou motiveer en elkeen omsien na die span en die individu se welstand. Hulle werk saam as ’n eenheid.”
“Ek het vanjaar een van my lewensdoelwitte bereik. Ek het altyd gedroom om in die Currie-beker-toernooi te speel.”
Luüs het gesê hy beoog om binnekort by sy familie en vriende in Bela-Bela ’n draai te maak. Sy ouers, Jaco en Almarie Luüs, woon in die Paarl.
“My Kersfeesboodskap aan almal is om positief te bly, om nie vingers na iemand te wys nie en om saam te staan, want dan kan ons enigiets deurmaak. Suid-Afrikaners gee mos nie maklik op nie!”
