Rolbalsakeliga uiteindelik weer op die been
Die Warmbad-rolbalsakeliga sit op Dinsdag 13 Oktober weer die bal aan die rol.
Plaaslike sakelui en hul personeellede neem jaarliks aan hierdie toernooi deel om spanbou en samewerking tussen verskillende rolspelers in die dorp te verbeter.
Die grendelstaat het egter vanjaar tot gevolg gehad dat die meeste professionele sport- en klubaktiwiteite in die wiele gery is.
Sportsoorte soos rolbal mag weer sedert die begin van September beoefen word.
Faan Rossouw, Warmbad-rolbalklubpresident, het by navraag gesê:
“Die aansoeke vir die toernooi het reeds gesluit, maar ons is opgewonde dat 22 spanne reeds vir die toernooi ingeskryf het. Almal sien met afwagting na die toernooi uit.”
Volgens die bestuur sal die gewone Covid-19-veligheidsmaatreëls gehandhaaf word.
“Rolbal SA het aan ons toestemming verleen dat 48 spelers op die baan toegelaat mag word en dat ons sonder maskers mag speel. Die spelers wat die baan verlaat, moet steeds aan al die veiligheidsmaatreëls voldoen,” het hy gesê.
“Die rolballe sal vooraf en tydens die toernooi ontsmet word en daar moet streng rekord gehou word van teenwoordiges by die klub.”
Rossouw het gesê indien ’n speler simptome van Covid-19 het of positief vir die virus toets, moet hul aan die toernooi onttrek.
’n Plaasvervanger moet deur die span aangewys word en die bestuur moet in kennis gestel word.
Rossouw het benadruk dat die voortbestaan van die toernooi op spelers se samewerking berus. Hy het gesê klublede is, ondanks al die streng maatreëls, baie opgewonde oor die toernooi.