Sportklubs wag in spanning om te hoor wanneer hul weer kan oefen
Sportklubs sal nog ’n ruk moet wag voordat hulle weer mededingend teen ander klubs kan meeding.
Luidens ’n verklaring van Willem Strauss, president van die Blou Bulle rugby-unie (BBRU), aan die Kwagga-rugbyklub van Bela-Bela, mag daar tans slegs beperkte oefening deur professionele atlete en spanlede plaasvind. Die riglyne vir professionele spansportoefening is op Saterdag 30 Mei deur Nathi Mthethwa, minister van sport, kuns en kultuur, uiteengesit. Die vrees bestaan dat spanbyeenkomste die koronavirus (Covid-19) verder kan laat versprei.
Plaaslike sportklubs word steeds verbied om op vlak 3 saam te oefen en mag nie aan wedstryde deelneem nie.
Die presiese voorwaardes wat tydens vlak 3 van die grendeltyd van toepassing sal wees op professionele atlete moet nog in die Staatskoerant gepubliseer word.
Die Waterberg-rugbyliga se program word intussen tot verdere kennisgewing teruggehou.
Die Kwagga-rugbyspan se lede het tydens die inperking individuele oefenprogramme van hul afrigters ontvang om hul krag en stamina op te bou.
Die Nylstroom-klublede het ook op hul eie geoefen.
“Die teleurstelling om nie te speel nie, raak almal. Die spelers is angstig om weer te kan speel en ons wag op die regering om aan te dui wat die pad vorentoe is,” het Jannie Venter, Nylstroom-klubpresident, aan Die Pos gesê.
Die Nylstroom-klubbestuur en spanlede hoop om teen Augustus die groen lig te kry om weer te oefen en om in September teen ander spanne mee te ding, het Venter gesê.
