Gewilde Waterberg-rugbyfees skop dié Saterdag af
Spelers van die onderskeie plaaslike dorpsrugbyspanne sien uit na die komende Waterberg Fees-rugbykompetisie.
![](https://images.caxton.co.za/wp-content/uploads/sites/134/2020/03/rugbyfees.jpg)
Hierdie kompetisie is die voorloper vir die liga wat later vanjaar plaasvind.
Spanne soos die Kwagga-rugbyklub van Bela-Bela het ter voorbereiding die afgelope aantal weke in groepe aan fiksheidstoetse deelgeneem.
Volgens Drummond Hammond, Kwagga-klubvoorsitter, beloof die Waterberg Fees om opwindende rugby vir die spelers en toeskouers op te lewer.
Elke span speel 35 minute aan ’n kant. ’n Span beoordelaars ken punte toe vir elke beweging wat op die veld uitgevoer word.
Vir elke drie wat gedruk word wen die span een punt, vir elke skrum vyf punte, vir elke lynstaan vyf punte en vir die beste spangees kan nog drie punte bygereken word. Die span met die geesdriftigste toeskouers kan nog drie punte by hul totaal tel.
Vir elke skrum of lynstaan wat ’n span afstaan, verbeur hulle egter een punt en dié punte word van die totaal afgetrek.
Altesame 11 rugbyklubs — Amandelbult, die Rhino’s, die Kwaggas, Marble Hall, Mogol, Potgietersrus, Naboom, Vaalwater, Nylstroom, Thabazimbi en Loskop — neem deel aan die kompetisie.
Die eerste wedstryde skop op Saterdag 14 Maart om 15:30 op Amandelbult se rugbyveld af tussen die Kwaggas en die span van Marble Hall. Die Naboom- en Vaalwater-rugbyklubs speel dieselfde tyd op Mogol se velde.
Die ander datums, tye en plekke van die kompetisie is voorlopig as volg:
- Saterdag 21 Maart in Marble Hall: Kwaggas teen Potgietersrus om 15:30. Marble Hall teen Nylstroom om 17:00.
- Saterdag 21 Maart in Mookgophong: Thabazimbi teen Mogol om 14:00. Loskop teen Vaalwater om 15:30. Naboom teen Rhino-klub om 17:00.
- Saterdag 28 Maart in Loskop: Naboom teen Marble Hall om 15:30.
- Saterdag 28 Maart in Modimolle: Nylstroom teen Mogol om 17:00.
- Saterdag 4 April in Vaalwater: Amandelbult teen Kwaggas om 14:00. Nylstroom teen Loskop om 15:30. Vaalwater teen Mogol om 17:00.
- Saterdag 4 April in Mokopane: Thabazimbi teen Rhino-klub om 15:30. Naboom teen Potgietersrus om 17:00.
- Saterdag 18 April in Bela-Bela: Loskop en Thabazimbi om 14:00. Vaalwater teen Amandelbult om 15:30. Kwaggas teen Naboom om 17:00.
- Saterdag 18 April in Northam: Rhino-klub teen Nylstroom om 17:00.