Oud-Hansies byeen vir ’n goeie potjie gholf
Gholfspelers het van heinde en ver opgedaag om deel te neem aan Hoërskool Hans Strijdom in Mookgophong se gholfdag.
Meer as 80 oudleerders het aan die gesellige byeenkoms deelgeneem.
Die spelers het op Saterdag 23 November by die Naboomspruit-gholfbaan aangekom vir die gholfdag wat deur Mauritz Hansen, een van die vorige hoofde van die skool, gereël is. Volgens Hansen was daar nie minder nie as sewe oudhoofseuns wat hul vernuf op die gholfbaan gewys het. Die spelformaat was ’n vierbal-alliansie, beste bofhou en twee tellings op elke putjie. Altesame 18 spanne het deelgeneem.
Die dag is gehou om die bande tussen oud-Hansies te verstewig en geld wat ingesamel is, sal hoofsaaklik ten bate van die gholfklub aangewend word. “Die samesyn was heerlik en ’n wonderlike gees van samehorigheid en Hansie-kameraadskap het geheers,” het Hansen gesê.
Spikkels de Wet, waarnemende hoof, kon nie uitgepraat raak oor al die oudleerders wat hy ná baie jare weer gesien het nie. “Dit was ’n belewenis, want ek het die meeste van die spelers geken,” het hy gesê.
Russel Frans en De Wet het die pryse vir naaste aan die pen gewen. Naas Muller se span was die wenners met 108 punte, Hendrik Malan se span was tweede met 107 punte en Quinton Botes se span derde met 106 punte.
Daar was drie skape op die spit en daar is tot laat onthou- jy-nog-verhale vertel. Die gholfdag sal voortaan jaarliks plaasvind.