Trek die drafskoene nader
Die wedloop lok jaarliks ongeveer 1 200 atlete wat ’n groot mylpaal vir ’n plattelandse wedloop is.
Die jaarlikse SuperSpar Bela-Bela-marathon is een van die hoogtepunte op drawwers en stappers se jaarlikse padwedloopkalender en word met trots aangebied deur die Bela-Bela/Warmbad-marathonklub.
Die wedloop vind op Saterdag 9 November plaas terwyl die klub sommer ook die 30ste bestaansjaar van dié padwedloop vier. Die wedloop se begin- en eindpunt is by die hoofpawiljoen op Hoërskool Warmbad se sportterrein.
Die wedloop lok jaarliks ongeveer 1 200 atlete wat ’n groot mylpaal vir ’n plattelandse wedloop is.
Afstande waaraan deelgeneem kan word, sluit in 42,2 km (Comrades-kwalifiseerder), 21,1 km, 10 km en ’n 5 km-pretdraf. Stappers is welkom in al die afstande en stootwaentjies word in die 5 km toegelaat.
SuperSpar Bela-Bela, waarvan Carel Coetzee die eienaar is, is weer vanjaar die hoofborg.
Agua è Vida Living Water is die waterborg en hulle sal seker maak dat atlete die beste gehalte water, verryk met 84 minerale, tydens die wedloop ontvang.
Voorafinskrywings kan aanlyn gedoen word by www.entrytime.com(.)
Dié aanlyninskrywings sluit op Vrydag 1 November, maar daar kan nog op Vrydag 8 November by SuperSpar Bela-Bela vanaf 16:00 tot 19:00 ingeskryf word, asook die oggend van die wedloop vanaf 04:30 (by die wegspringpunt by Hoërskool Warmbad).
Wedloopnommers kan op Vrydag 8 November vanaf 16:00 tot 19:00 by SuperSpar Bela-Bela afgehaal word of op Saterdagoggend vanaf 04:30 by die wegspringpunt.
Daar wag heerlike verversings by die eindpunt en daar sal ook ’n biertuin wees om die dors te les.
Neels Venter, klubvoorsitter, bedank die gemeenskap en mense by die waterpunte vir hulle lojale ondersteuning en bydraes.