Eerste plek vir duiweboer
Gert Pieterse van Mookgophong se jare lange harde werk, toewyding en passie is beloon en sy droom bewaarheid toe hy aangewys is as algehele wenner en wedvlugduiweboer van Limpopo vir 2019.
Pieterse is aangewys as kampioen van die Sentraal-streek én die gekombineerde Verre Noord Resiesduif Federasie (VNRF) en Sentraal-Limpopo (SLIM) se kampioenskap. Hy het al die kategorieë gewen met 5 468 punte. Pieter Bekker van Modimolle was tweede met 5 378 punte en Vikings Racing Team derde met 5 283 punte. In die Sentraal-streek het hy Trevor Webster met 61 punte geklop. Pieterse sal sy trofeë op Saterdag 2 November by ’n glansgeleentheid in Polokwane ontvang.
“Daar is elke naweek twee wedvlugte. My jong duiwe het aan die begin van die seisoen siek geword en dit het nie goed gegaan nie. Gelukkig het hulle reggekom en uitstekend gevlieg,” het ’n trotse Pieterse aan Die Pos vertel.
Hy sê duiweboere van regoor die land wil van sy gesogte duiwe bekom. “Ek was só dankbaar dat ek sommer van my duiwe weggegee het. Dit is ’n lekker gevoel om ander boere te help en mekaar te ondersteun,” het hy beskeie gesê.
Pieterse praat met trots van sy hokbestuurder wat twee jaar gelede saam met hom begin werk het. Hampie Kruger (77) is ’n pensioentrekker wat self jare lank met wedvlugduiwe geboer en gevlieg het. Hy het in 1960 op Springfontein in die Vrystaat met dié stokperdjie begin, maar omdat hy as spoorwegwerker baie moes verhuis, het hy die duiweboerdery laat vaar.
Nadat hy ’n advertensie gesien het van Pieterse wat ’n hokbestuurder wou aanstel, het hy geweet dit is wat hy tydens sy aftrede wil doen. “Ek is so gelukkig om hom hier te hê om my te help,” het Pieterse gesê.
Pieterse het sowat 30 jaar gelede, toe hy self nog op skool by Hoërskool Hans Strijdom was, met die sport begin.
Hy laat sy duiwe elke dag sowat 40-60 km vlieg. Hy het in 2011 ’n nuwe duiwehok gebou met ventilasie in die dak sodat daar altyd genoeg vars lug vir die duiwe is.
“Dit is harde werk en baie genade en ek is dankbaar vir vanjaar se sukses,” het hy gesê.