Honderde atlete tree aan vir byeenkoms
Die kompetisie was witwarm tydens die afgelope Standard Bank Ironman 5150-driekampbyeenkoms wat op Saterdag 17 Augustus by Forever Resorts in Bela-Bela aangebied is.
Altesame 1 357 atlete vanuit die nege provinsies, asook 12 lande, het die oggend by die oord se ski-dam aangetree om die 1,5 km swem-item, 40k m-fietswedren en 10 km-padwedloop baas te raak.
Amateurs kon ook die kans tot glorie geniet deur die 400 m-swem-, 20 km-fietswedren en 5 km-padwedloop aan te durf.
Selfs amateuratlete wat in die onderskeie ouderdomsgroepe deelgeneem het, kon in die eerste drie plekke medaljes verower.
Volgens die organiseerders was die dag heerlik met 27°C op sy warmste.
Die atlete het behoorlik gesweet toe hul op die warmste deel van die dag die fietswedren op die Alma-pad moes aanpak. Die topatlete het hulle egter nie van stryk laat bring nie en baie goeie tye behaal. Die fietswedren het binne die Forever Resorts-terrein geëindig.
Die mans- en vrouewenners was HJ Cronjé en Tracy Dennis.
Cronjé het na afloop van die byeenkoms gesê hy sien reeds uit na die Ironman 70.3-wêreldkampioenskap oor twee weke in Frankryk.
Twee ander Ironman-geleenthede wat gewild is onder atlete vind in Oktober in Ekurhuleni en later in Nelson Mandelabaai plaas.
