Nylstroom-rugbymanne is kookwater
Die Nylstroom-rugbyklub is ’n span om mee rekening te hou in die Waterberg-liga.
Die manne van Nylstroom het op Vrydag 28 Junie, in die laaste wedstryd van die klubkampioenskap, weer geseëvier toe hul die Rhino-rugbyklub van Northam oortuigend geklop het met ’n telling van 29-12.
Dié sege het gevolg ná die puik wedstryd teen Amandelbult-rugbyklub wat Nylstroom met 88-0 gewen het.
Volgens Jannie Venter, Nylstroom se klubpresident en afrigter, is sy span nou algeheel tweede op die ligaranglys en het hulle deurgedring na die semifinale ronde.
“Ons het ’n baie mooi wedstryd teen die Rhino-klub gespeel en ek is baie trots op die span,” het Venter gesê. “Die manne het hul staal gewys en hard gewerk in die tweede helfte. Daar was selfs ’n bonuspunt vir die drie wat ons gedruk het.”
Die Nylstroomspelers wat uitgestaan het in die wedstryd teen die Rhino’s was Herman Lange (voorspeler) en Jozhua Badenhorst (agterlynspeler).
Die semifinalewedstryd tussen Nylstroom en die Loskop-rugbyklub van Groblersdal vind op Vrydagaand 5 Julie om 20:00 op Hoërskool Nylstroom se veld plaas. Toeskouers is welkom.
