Nylstroom-rugbyklub is goed op dreef
Die Kwaggas-rugbyklub van Bela-Bela lek steeds hul wonde nadat hulle op Vrydag 10 Mei teen die Nylstroom-rugbyklub met 35-3 verloor het.
Dit was die tweede wedstryd in die jaarlikse Waterberg-liga.
Marc van Bosch, ’n oud-Warrie, maar deesdae Nylstroom-klub se blitsige flank, is ná sy span se sege as speler van die wedstryd aangewys.
In die eerste Waterberg-ligawedstryd, wat op Vrydag 3 Mei gespeel is, het Nylstroom die span van Vaalwater met 24-3 geklop.
Jannie Venter, Nylstroom-klubpresident, het na afloop van die wedstryd teen die Kwaggas gesê die spelers het “effe seer” van die veld gestap, maar hulle is positief en tevrede met die span se vertoning.
Chris Goosen, afrigter van die Kwaggas, het gesê die geluksgodin was nie aan hulle kant tydens die wedstryd nie, maar die Kwaggaspelers sien uit na die res van die seisoen.
Nylstroom se volgende wedstryd vind op Vrydag 17 Mei teen Mogol in Modimolle op Hoërskool Nylstroom se veld plaas. Die Kwaggas maak ook dieselfde dag litte los teen die Loskop-rugbyklub op die opposisiespan se veld.