Mokupi in kryt teen wêreldtitelhouer by Emperor’s Palace
Karabo Mokupi se hande jeuk vir ’n wêreldtitel.
Dié 20-jarige bokser van Phagameng se droom begin al hoe meer binne bereik lyk. Hy is die afgelope week deur die bokspromotors Golden Gloves in kennis gestel dat hy op Saterdag 23 Februarie by Emperor’s Palace kragte gaan meet teen die gesoute internasionale middelgewigbokser Dowayne Combrink.
Die 28-jarige Combrink was al wêreldtitelhouer en het gelykop geëindig in ’n wêreldtitelgeveg teen Giovanni Bushby.
“Ons is op pad na iets besonders,” het Peet Oberholzer, Mokupi se afrigter, aan Die Pos gesê. “Hierdie geveg kan vir ons baie beteken. As Karabo wen, lê daar wêreldkaliber gevegte vir ons voor.” Plaaslike en internasionale media het reeds belangstelling in dié jongeling getoon.
“Ons het baie voorbereiding om te doen. Ons werk nou aan Karabo se voete, handspoed en vloeiendheid. Sy teenstander is baie sterk en het uithouvermoë. Combrink is bekend vir sy uitklophoue, maar hy is nie so vinnig soos Karabo nie.”
Mokupi kry ook afrigting in skermwerk by die voormalige wêreldkampioen Sebastian Rothmann in Pretoria.
Oberholzer het vyf nuwe jong opkomende boksers wat afrigting kry by Obie’s Boxing and Fitness Gym by Hoërskool Nylstroom.
“Ons is opgewonde oor Karabo se toekoms. Die geld wat op die spel is, verdriedubbel met dié soort gevegte. Hy het ’n blink toekoms voor hom.”
Jong opkomende sterre soos Mokupi het egter uitdagings en die grootste hiervan is om borge te bekom wat hom in staat sal stel om voltyds te oefen en sy volle aandag aan boks te wei. Belangstellendes kan Oberholzer bel by tel. 072 635 8150.
