Brief: ’n Ope brief van TLU SA aan die boere van Suid-Afrika
Ons boere is steeds daagliks besig om hul dagtaak met buigsaamheid aan te durf en planne om te kan produseer te maak.
![](https://images.caxton.co.za/wp-content/uploads/sites/134/2024/05/commercialfarming.jpg)
Beste Boere van Suid-Afrika,
In die aangesig van meedoënlose teenkanting skyn julle toewyding helderder as ooit tevore. Terwyl julle sorg vir jul lande en vee, en uitdagings wat min kan begryp trotseer, weet dat julle nie alleen is nie. TLU SA staan saam met julle, onwrikbaar in ons ondersteuning en solidariteit.
Suid-Afrika is onder druk, of daar kan amper gesê word, onder beleg, van ’n beleid waarvan die uitkomste nie positief is nie. Ons moet ’n paar aspekte in gedagte hou:
Die beleidsomgewing waarbinne ons moet boer is gewis nie gunstig nie en skep nie die nodige vertroue sodat daar onbevange beleggings in ons land gemaak word nie.
Die hitte-eenhede se impak, gepaardgaande met die droogte wat groot dele van ons land op ’n kritieke groeityd getref het, het op vele plase uiters negatief ingespeel.
Die onrealistiese beloftes wat in aanloop tot die verkiesing gemaak word, skep nie noodwendig stabiliteit nie.
Kernbelangrike aspekte soos veiligheid en goeie infrastruktuur, wat kragvoorsiening insluit, is besig om te taan in stede om die broodnodige positiewe verskil wat ons land nodig het te maak.
Te midde van hierdie stand van sake is ons boere steeds daagliks besig om hul dagtaak met buigsaamheid aan te durf en planne om te kan produseer te maak.
Ons verstaan die ontelbare ure wat julle in jul lande giet, die opofferinge wat julle maak, en die risiko’s wat julle dapper neem. Julle toewyding onderhou nie net jul gesinne nie, maar ons land se mense in geheel. In hierdie roerige tye is julle rol as voedselprodusente van die land meer noodsaaklik as ooit. Kos op die tafel is die resultaat van jul toewyding wat gewis gesien kan word as sekerlik die belangrikste stabiliseerder in ’n deurmekaar land.
As rentmeesters van die bodem waarmee jul as boere werk is jul benadering en ingesteldheid ’n voorbeeld vir vele oor hoe moet ons daagliks ons kultuuropdrag beoefen. Die geloofspad waarop die boere stap bring daagliks realistiese hoop wat keusemaking positief rig.
Ons erken die ontberings wat julle verduur, van ekonomiese druk tot die bedreiging van geweld en onsekerheid. Jul moed in die aangesig van uitdagings inspireer ons almal. TLU SA is verbind daartoe om vir jul regte te pleit, te verseker dat jul stemme gehoor word, en te veg vir die beskerming van jul lewensbestaan.
Terwyl julle voortgaan om te werk onder die Afrika-son, weet dat jul pogings nie ongesiens verbygaan nie. Julle is die ruggraat van ons landbou-sektor, die hartklop van ons land se ekonomie en die rentmeesters van ons voedselsekerheid.
Laat ons as ’n eenheid saamstaan, skouer aan skouer, terwyl ons die toetse wat voorlê aandurf. TLU SA is hier om julle elke tree van die pad te ondersteun, om vir jul regte te pleit, jul saak te bevorder, en onverpoos te werk om ‘n helder toekoms vir Suid-Afrikaanse landbou te verseker.
Landbou móét seëvier.