Brief: Smouse maak hoofstraat ’n seeroog

’n Jarelange inwoner van Modimolle skryf:

Ek het onlangs omstreeks etenstyd in ’n gedeelte van Modimolle se hoofstraat (Nelson Mandelaweg) afgestap en kan dit eintlik as “bundu bashing” beskryf.

Orals is onooglike lendelam strukture, wat onwettig opgerig is, waarby straatsmouse hul ware verkoop. Dit wil voorkom asof sommige smouse ook hier slaap wat lei tot ’n groter gemors. Daar lê piesangs en ander vrugte of groente in verskillende stadiums van verrotting, klere, gebreekte skoene en ander rommel gesaai oor die sypaadjie. Mens kan eenvoudig nie meer gemaklik daar verby stap nie.

Ek kry die enkele sakelui wat daar probeer sake doen, baie jammer want dis onmoontlik om hiermee te kompeteer. Daarmee saam jaag dit ook voornemende klante weg omdat dit onveilig is.

Ek kan insien hoekom inwoners wat jare gelede hier kom aftree het, toe die dorp nog Nylstroom genoem was, hulle goed pak en verhuis. Dis ’n skande om te sien hoe alles agteruitgaan.