Jeannetta Botes, Bela-Bela, skryf:
Die jaar 2020 was vir almal ’n baie moeilike jaar, maar ek wil graag drie veertjies aan die volgende sakeondernemings uitdeel wat wonderlike diens aan my gelewer het.
Ek het ’n probleem met my voertuig ondervind. Dit het vir my na ’n reusetaak gelyk en geklink, maar Santie Boshoff van BB Auto Body Rebuilds het my gerusgestel en sommer gou die fout laat herstel.
Daarna het ek vir Willem Botha by Hi-Q gebel namens ’n vriend wat ’n motorbattery nodig gehad het.
Ek het dit probeer reël met die ooreenkoms dat die battery vervang sal word nadat ek die volgende dag kom betaal het.
Groot was my verbasing toe ek Hi-Q besoek en Willem my meedeel dat die battery reeds vervang is, want hy het my stem herken en geweet dat ek ’n gereelde kliënt is.
My laaste veertjie gaan aan SuperSpar in Bela-Bela. Ek het ’n spesiale vleisbestelling vir hulle deurgegee, maar in my lekker geselsie met die vriendelike personeellede, nie die nodige kontakbesonderhede verskaf nie.
Ek het gedink ek sal die volgende dag maar self moet ingaan winkel toe om die bestelling af te handel.
Groot was my verbasing toe Brian, die vriendelike blokman, om halfsewe dieselfde aand met my volledige bestelling by my huis opdaag.
Hiermee bedank ek al die sakeondernemings vir hul toewyding en vriendelike diens gedurende 2020. Geseënde Kersfees aan julle almal.
