Piet du Toit, Modimolle, skryf:
Die indruk wat geskep word dat die toegewydheid en prestasie van die dorp se burgemeester en haar span nie waardeer word nie, is nie heeltemal waar nie.
Hul kommunikasie en inligting wat uitgestuur word is uitstekend. Dit hou ons op hoogte van wat aangaan en help ons om die logistiek en funksies van die munisipaliteit te verstaan.
Die harde werk word baie waardeer en hulle word nie aangeval en gekritiseer nie. Die “soft skills” word goed uitgevoer.
Die probleem is dat die infrastruktuur van Modimolle besig is om agteruit te gaan. Die elektriese netwerk word nie ordentlik gediens nie. Straatligte word nie herstel nie, skakeltuig en transformators word nie onderhou nie, paalstrukture is vrot, boomtakke groei wild tussen oorhoofse kabels en foutiewe ringvoerders word nie herstel nie.
Die waterstelsel is ook onder druk. Pompstasies word nie gediens nie. Dit het tot gevolg dat nie al die pompe meer in ’n werkende toestand is nie. Die pompe lek water en elektriese paneelbedrading het aandag nodig.
Rioolmangate loop gereeld oor en die probleme word nie ordentlik herstel nie. ’n Mens wonder hoe dit by die rioolsuiweringswerke lyk.
Die dorp se paaie is in ’n toestand. Slaggate word herstel, maar dit is nie volhoubaar nie. Parkeer- en stopstraatlyne is op baie plekke nie sigbaar nie. Mense parkeer net soos hulle wil. Sommige verkeersligte is beskadig en buite werking. Ja, dit kos harde werk om ’n wanfunksionele munisipaliteit reg te ruk.
Dit is ook moeilik om te glo dat daar nie maniere is om die mense wat nie presteer nie, aan te spreek en dissiplinêre stappe te neem teen hulle en hulle verantwoordbaar te hou nie. Die vraag is wie is verantwoordelik om die regrukaksies te koördineer en toe te sien dat die aksieplanne uitgevoer word?
As die raad en wykskomitee nie die mag het nie, wie moet dan toesien dat alles reg loop?