Daar is niks om weg te steek, sê burgemeester
Ons het nog altyd daarna gestreef om inwoners en belanghebbendes op hoogte te hou van ons planne en besluite en antwoord graag die sakekamer se brief in verlede week se uitgawe van Die Pos met die doel om ’n aantal kwessies en beweringe op te klaar.
![](https://images.caxton.co.za/wp-content/uploads/sites/134/2020/09/wegsteek-freepik.jpg)
Marlene van Staden, burgemeester, Modimolle-Mookgophong-munisipaliteit, skryf:
Ek bedank graag die Waterberg Sakekamer vir hul aktiewe deelname wat betref ons pogings om die Modimolle-Mookgophong plaaslike munisipaliteit te verbeter.
Ons het nog altyd daarna gestreef om inwoners en belanghebbendes op hoogte te hou van ons planne en besluite en antwoord graag die sakekamer se brief in verlede week se uitgawe van Die Pos met die doel om ’n aantal kwessies en beweringe op te klaar.
Ons het hard gewerk tydens die onlangse begrotingsproses om die beleid vir eiendomstariewe te hersien. Die beleid is, met insae van regspraktisyns, heeltemal herskryf vir die 2020/21-boekjaar en dit is beslis nie ’n “spoeg-en-plakdokument” nie.
As deel van die proses het ons by die nasionale minister aansoek gedoen om ’n subkategorie vir kleinhoewes te skep in terme van die Munisipale Eiendomswet 6 van 2004. Dié aansoek moet egter 15 maande voor die goedkeuring van die nuwe begroting ingedien word en ons kon daarom nie die bykomende eiendomskategorie vir hierdie boekjaar byvoeg nie.
Wat betref die tyd-van-gebruik seisoenale (TOU) tariewe: Soos die sakekamer tereg weet, het die munisipaliteit die besluit geneem om dié tariefstruktuur in te stel omdat dit die struktuur is waarvolgens Eskom die munisipaliteit se grootmaatkragverbruik hef en dit is ook die tariefstruktuur wat Nersa sedert 2008 aanbeveel.
Die sakekamer voer aan dat die munisipaliteit se tariefbeleid gewysig moet word om die TOU-tariewe in werking te stel. Die Wet op Munisipale Stelsels 32 van 2000 vereis egter dat die tariefbeleid leiding moet gee oor die soort koste wat deur die tariewe verhaal moet word.
Die presiese tariefstruktuur word egter saam met die begroting goedgekeur. Die TOU-tariewe is al sedert 2019 by verskeie vergaderings met belanghebbendes bespreek. Dit is in Augustus 2019 in beginsel deur die raad aanvaar en is tydens die hele goedkeuringsproses ingesluit in die tariefboek wat deel gevorm het van die 2020/21-begroting.
Die munisipaliteit in Junie 2020 noodgedwonge die begroting van Mei aanpas om voorsiening te maak vir die realiteite van die Covid-19 pandemie, insluitend aanpassings vir persoonlike beskermende toerusting en rampbestuurfondse. Mei- en Junie-begrotings vir 2020/21 het die TOU-tariewe ingesluit.
Ten spyte van die raad se goedkeuring, is die TOU-tariefstruktuur nog nie geïmplimenteer nie omdat ons steeds op Nersa se goedkeuring wag. Die feit van die saak is: Sonder die TOU-tariewe kan die munisipaliteit nooit die volle koste van die elektrisiteitsdiens verhaal nie. Indien ons so aangaan, sal die skuld aan Eskom aanhou vermeerder en ons sal nooit genoeg geld hê om die elektrisiteitsnetwerk te onderhou nie.
Die sakekamer beweer dat Eskom die munisipaliteit penaliseer vir wanbetaling deur die elektrisiteitstoevoer te verminder. Dit is onwaar en ingevolge ’n hofbevel word Eskom verbied om so op te tree. Die onlangse verlengde kragonderbrekings in Modimolle is deur die munisipaliteit, in samewerking met EMS, ondersoek.
’n Aantal onderhoudskwessies is by die hoofsubstasie uitgewys en korrektiewe maatreëls sal so spoedig moontlik ingestel word om die situasie te normaliseer. Die sakekamer verwys verder na inkomste uit elektrisiteitsverkope wat aan bedryfskostes bestee word.
Dit is heeltemal in pas met goeie munisipale bestuur. Ingevolge ons ooreenkoms met Eskom, bekragtig deur ’n hofbevel, betaal die munisipaliteit weekliks 60% van alle inkomste wat dit uit elektrisiteitsverkope genereer aan Eskom oor.
Daar is egter talle ander koste verbonde aan die lewering van ’n elektrisiteitsdiens, insluitend onderhoud, salarisse, invordering ensovoorts, wat ook deur elektrisiteitsverkope befonds moet word. Ons was nog altyd openhartig en deursigtig wat betref ons stryd met die munisipaliteit se groot uitstaande skuld aan Eskom.
Buiten historiese faktore, bly die grootste bydraende faktor tot ons groeiende Eskomskuld die feit dat ons huidige tariefstruktuur nie die volle koste van ons elektrisiteitsdiens dek nie. Onder die huidige tariefstruktuur, selfs al was ons verhalingskoers 100%, sal ons nooit in staat wees om ons Eskomrekening ten volle te betaal en die netwerk te onderhou nie.
Op die korttermyn mag die nuwe tariefstruktuur daartoe lei dat gebruikers aanpassings moet maak, maar dit is ’n regverdige en billike verandering en in die beste belang van die munisipaliteit oor die langtermyn.
Daar is beslis geen pogings om inligting van ons inwoners te weerhou nie; inteendeel, ons verstaan baie goed dat ons nie die munisipaliteit sonder die ondersteuning en samewerking van ons gemeenskappe kan omkeer nie.
Ons mikpunt is om koste-effektiewe, betroubare en volhoubare dienste aan al ons inwoners te lewer en ons wil graag ’n konstruktiewe en wedersyds voordelige verhouding met alle belanghebbendes bou.