Tinus Ras, DA-raadslid, Bela-Bela, skryf:
Voor die effek van die Covid-19-pandemie op ons plaaslike bestuur, het die Bela-Bela-munisipaliteit nie voldoen aan die verwagting van die publiek en sakeondernemings nie.
Die swak bestuur op sekere vlakke, onoordeelkundige aanwending van fondse, asook die slegte invordering van skuld het bygedra tot die bleek ekonomiese vooruitsigte van ons dorp. Die feit dat die munisipaliteit nog steeds nie op volle kapasiteit van hul arbeidsmag is nie, verbeter nie die swak diensleweringrekord nie.
Probleme wat gereeld voorkom en waaraan die opposisieparty baie aandag en tyd bestee, is waterlekke (veral die nuwe pype), kragonderbrekings, foutiewe waterlesings en die verkeersafdeling wat glad nie voldoen aan die vereistes nie (veral met die uitreiking van nuwe lisensies, hernuwing van bestaande voertuiglisensies en rybewyse).
Wetstoepassing is ook rede tot kommer. Straatligte werk nie, slaggate is volop en paaie is in ’n baie swak toestand. Verder bly die grondbesettings in die munisipale gebied ’n groot probleem. Daar is dalk hoop dat die straatligte weer sal brand, omdat ’n projek in dié verband binnekort van stapel gestuur word.
’n Gebrek aan geld maak dit egter baie moeilik — byna onmoontlik — om al hierdie probleme in die afsienbare toekoms te oorkom. Die opposisieparty werk hard agter die skerms om hierdie situasie te verander, maar die munisipaliteit stel beslis nie die belang van alle inwoners as eerste prioriteit nie.
Gesien in die lig daarvan dat Wyk 1 tot meer as 70% van die munisipaliteit se inkomste bydra, sal dit ons saak ondersteun as die gemeenskap nou saamstaan en probleme aanspreek. Die DA kan ongerymdhede, soos grondbesettings, stuit.
Dit verg egter samewerking vanuit die gemeenskap om weer ons dorp te laat herleef na die spogdorp wat dit was. Kom ons vat terug wat aan die hele gemeenskap behoort. Ek sal eersdaags die dorp se finansiële situasie aan die gemeenskap bekendmaak.
