Century 21-personeel, Bela-Bela, skryf:
Vir ons hier by die kantoor was oom Nic van Heerden nie net “Fred se pa”, “Zippie (Talita se bynaam) se skoonpa” en “NJ, Elmarie en Lindie se oupa” nie.
Hy was vir baie van ons ’n geliefde oupa-figuur. Hy was daar tydens al ons prestasies en ook al ons teleurstellings.
Hy was op sy dag bekend as ’n groot sakeman en boer in ons gemeenskap. Ná sy aftrede het hy gereeld kom kuier en altyd gesorg vir ’n glimlag op ons gesigte.
As hy kantoor toe gekom het, was daar altyd ’n nuwe grappie om te vertel en iets nuuts vir ons om dae lank oor te lag en gesels, soos die keer toe hy met ’n opgestopte aap op sy voertuig se dak gery het net om mense se reaksie te toets.
Hy het graag mense se siele uitgetrek en was bekend vir die poetse wat hy gebak het. Hy was soms kontroversieel en ons onthou nog met ’n glimlag die keer toe hy sy hare bloupers gekleur het om soos NJ, sy kleinseun, te lyk.
Sy honde was sy lewe en hulle moes net die beste versorging kry. Hy was baie trots op sy kinders en het graag besoekers ingelig dat hy getroud is met die ma van hierdie suksesvolle kinders.
Tannie Joyce het hom vooruitgegaan, maar self sy moes maar soms net kop skud vir sy grappies. Ons dink tot vandag toe dat sy haar soms doof gehou het om rus vir haar siel te kry!
Oom Nic het ’n baie groot hart en oop hand gehad. As hy geweet het van iemand wat sukkel of honger is, het hy gehelp — partymaal ten koste van homself.
Dit is nooit maklik om van ’n geliefde afskeid te neem nie. Daar is altyd die gevoel van “as ek net vir oulaas …”
Ons bring hulde aan die persoon vir wie ons lief was. ’n Persoon wat dalk nie perfek was nie, maar deur God as ’n unieke wese geskape is.
Oom Nic, jy is en sal altyd spesiaal vir ons wees. Rus sag.
- Nic van Heerden (87), ’n oud-inwoner van Bela-Bela, is op Dinsdag 9 Junie in Pretoria oorlede nadat hy op Maandag 8 Junie met die koronavirus (Covid-19) gediagnoseer is.