Inwoner, Modimolle, skryf:
Ek verwys na William van Coller se brief oor die ondersteuning by die Bosveld Interhoër. Wat ’n pragtige raakvatbrief, tot by die misplaaste “klip-in-die-skoen-verwaandheid”.
Ons omgewing het sout-van-die-aarde-mense. Mense wat hul benodigdhede koop waar gehalte gerieflik bekombaar is, teen ’n bekostigbare prys. Min van ons mense kan sommer net enigiets in die dorp koop, bloot net omdat hulle die eienaar wil ondersteun.
Die entrepreneur lewer ’n diens, verskaf broodnodige werks- en opleidingsgeleenthede en is geregtig daarop om sy wins na hartelus te bestee — dikwels in borgskappe in ons gemeenskap. Hierdie is ’n basiese beginsel wat selfs in skole deur leerkragte aan leerders oorgedra word.
Ons het pragtige skole in ons omgewing, maar genadiglik het mense darem nog ’n reg op ’n keuse. Ons verwyt nie die pasiënt wat voel hy wil graag ’n spesialis in die stad sien nie. Net so verwyt ons nie die plaaslike vakansieganger wat nie lus het om in die plaaslike boer se “lodge” vakansie te hou nie, maar wel see toe wil gaan en sy wins of salaris daar wil bestee. (Die boer het dan nou net sy implimente, kunsmis en kruideniers in ons dorp gekoop, en selfs sy kinders in die plaaslike skool gehad.)
Kom ons gun elkeen sy reg om sy keuse na hartelus uit te voer, sonder om mekaar te beledig. Kom ons reik ’n hand (elmboog) na mekaar, leer bymekaar en ondersteun mekaar. Elke skool het voordele en nadele, maar die skole wat ag slaan op probleme, bly oor dekades top. Op die einde doen elke ouer wat hul voel die beste vir hul kind is.
