Reint van der Pol, Geloftefeeskomiteelid, Bela-Bela, skryf:
Onsekere omstandighede is sekerlik ’n gepaste beskrywing om ons toekoms in Suid-Afrika mee op te som.
Dit is ook ’n gepaste woord om die geskiedenispad van die Afrikaner se voorouers vanaf 1652 in die Kaap tot vandag te beskryf.
Die geskiedenis is geneig om homself te herhaal. ’n Duidelike voorbeeld is die Groot Trek in 1835 en vandag se immigrasie van Afrikaners na die buiteland. Die omstandighede wat Piet Retief (1835) laat trek het uit die Kaap, stem merkwaardig ooreen met die onsekere omstandighede wat ons vandag in ons land ervaar.
Bogenoemde herhaling van die geskiedenis maak dat ons terugkyk en waardevolle lesse uit die mislukkings en suksesse van ons voorouers leer.
Met erkenning aan Christene van daardie tyd, het die Afrikaners op die trekpad ook hul sekerheid by God en Sy Woord gesoek. Dit is met hierdie sekerheid waarmee hulle die feitlik onbewoonde binneland ingetrek het.
Daar het hulle uitgevind, en met duur lewensverliese betaal, dat die magtige Zoeloe-ryk onder Dingaan en sy voorganger Shaka vir hierdie onbewoonde binneland verantwoordelik was.
Die geboorte van die Gelofte van 1838 het plaasgevind onder die aanslae van Dingaan en sy gedugte Impi-soldate.
Die uitkoms van hierdie Gelofte het nie net die trekkerlede van uitwissing en vlug gespaar nie, maar dit het ook vrede gebring vir inheemse volke wat reeds vlugtelinge was.
Dit is Hom — God wat lig is — vir wie ons op 16 Desember aanbid en dank.
Die wonderoorwinning van 467 trekkerlede teen 15 000 Zoeloes bly ongeëwenaar in vergelyking met die slag van Ishindwana van 1879, waar die magtige Britse ryk se 1250 soldate deur die Zoeloe-mag verslaan is.
Ons glo dat God die stryd gevoer het by Bloedrivier en dat ons voorvaders hulle nie vir hul geloof geskaam het nie. Met volle erkenning aan ander Christene het hierdie groep trekkerlede van die Bloedrivier Gelofte Christendom in Suid-Afrika gevestig.
Hoe anders sou die geskiedenis nie verloop het as die slag van Bloedrivier ’n nederlaag was?
Daarom is 16 Desember ’n dag van verootmoediging voor God en ’n soeke na versoening met Hom, te midde van die onsekere omstandighede waarin ons leef. Ons moet gehoorsaam wees aan Sy Woord as ons die Gelofte van ons voorouers gestand wil doen.
- Kom luister op Maandag 16 Desember na ’n dialoog tussen Faan Rabie en Paul Smith by die NG-gemeente Warmbad-Wes, op die hoek van Gilfillan- en Oosthuizenstraat in Bela-Bela. Die tema is Quo Vadis — die pad vorentoe? Ds. Bernard Hattingh sal die diens behartig waarna die dialoogopvoering aangebied word. Die verrigtinge begin om 08:40, die feesaanbieding om 09:00 en die erediens om 09:40. Verversings is ná die verrigtinge beskikbaar.
Vir navrae bel vir Reint van de Pol by tel. 082 563 7602.
