![](https://images.caxton.co.za/wp-content/uploads/sites/134/2019/12/belastingbetalers-pexels.jpg)
Charles Weber, Bela-Bela, skryf:
Die fundamentele doel van belasting wat deur inwoners betaal word, is dat die nodige geriewe deur die munisipaliteit verskaf en in stand gehou moet word.
Wanneer daar maar net in Robertsonrylaan beweeg word, sal lesers opmerk dat lamppale se elektriese bedrading heeltemal oop gelaat word nadat daaraan gewerk is. Dit is ’n groot gevaar vir kinders wat elke dag daar verbybeweeg.
Verder word die padverkeer vanaf Alma nie deur enige spoedgrens beheer nie.
Motorryers jaag die dorp teen ’n hoë spoed in en skep ’n groot gevaar vir voetgangers en ander padgebruikers. Hierdie probleem is ongeveer twee jaar gelede onder die aandag van die munisipaliteit gebring. Spoedwalle is goedgekeur en daar is daarvoor begroot, maar tot dusver is dit nog nie aangebring nie. Sommige paaie is in ’n haglike toestand.
Sowat 5% van Bela-Bela se inwoners dok vir alle uitgawes en verliese op, maar kry maar min in ruil daarvoor. Die munisipaliteit sal sy sokkies moet optrek as hy die dorp, wat nog baie meer vakansiegangers kan lok, wil aanhou bestuur.
Die tyd het aangebreek dat belastingbetalers hul stem begin dik maak oor hoe hul geld bestee word.