![](https://images.caxton.co.za/wp-content/uploads/sites/134/2019/12/waterkrisis.jpeg)
Armand Cloete, VF Plus-LP in Vrystaatse nasionale raad van provinsies, skryf:
Die interministeriële komitee op dienslewering moet sonder verwyl die impak van waterlekkasies en vermorsing by munisipaliteite ondersoek en oplossings op elke regeringsvlak vind om water te bespaar.
Dit is van kritieke belang om daadwerklike antwoorde te vind op die droogte- en waterskaarste in Suid-Afrika. Dit kan nie langer uitgestel word nie.
Die huidige droogte, veral in Noordwes, die Vrystaat en die Oos-Kaap, kan die enkele grootste sosiaalekonomiese of omgewingsramp word wat die land nóg getref het.
Die minister van menslike nedersettings, water en sanitasie, Lindiwe Sisulu, erken in hierdie verband onder meer dat die bou van damme sowat ’n dekade agter skedule is en dat foutiewe pompstasies, swak instandhouding en waterinfrastruktuur groot hoeveelhede water vermors.
Daarbenewens word waterbronne besoedel deur rioollekkasies en die vraag na water is in baie gebiede besig om die normale beskikbaarheid te oorskry.
Bestaande inligting toon dat tot 41% van die land se opgegaarde water verlore gaan weens lekkasies en swak infrastruktuur. Dit is daarom van die allergrootste belang om munisipaliteite te wys op die noodsaaklikheid daarvan om elke druppel water te bespaar.