Henk van de Graaf, streeksvoorsitter: TLU SA-Noord, skryf:
TLU SA vind dit uiters verdag dat Eskom skielik beurtkrag instel, slegs dae nadat die elektrisiteitsverskaffer ’n hofsaak teen Nersa, die nasionale energiereguleerder, aanhangig gemaak het omdat die entiteit nie tevrede was met die tariefverhogings wat goedgekeur is nie.
Dit wil byna voorkom asof hier sprake is van subtiele afpersing, soos dit in die verlede ook al meermale plaasgevind het as Eskom nie met Nersa se besluite saamgestem het nie.
Die verbruiker begin al die indruk kry dat as Eskom nie sy sin kry nie, daar beurtkrag ingestel word as ’n soort hefboom.
Die verduideliking dat daar al van verlede Saterdag af probleme was, maar die land eers die Woensdag sonder enige vooraf waarskuwing onverhoeds betrap is, is net so onaanvaarbaar.
Baie boere moet hul besproeiing in hierdie droogtetoestande en warm temperature behoorlik skeduleer sodat hulle kos kan voorsien. Hulle is die reg van behoorlike beplanning ontneem deur Eskom se laksheid en ongevoelige optrede.
Ek wil boere wat skade as gevolg hiervan ly, vra om TLU SA te kontak sodat ons kan kyk na gepaste optrede om die skade te verhaal.
Eskom het wel geld vir duur hofsake teen Nersa, maar kan nie noodsaaklike instandhouding bekostig nie. Dit is onaanvaarbaar en Eskom se bedryfshoof se verskoning aan die land vir die beurtkrag is nie die papier werd waarop dit staan nie.