Geraldine Paulsen, media- en kommunikasiebeampte, Voortrekkermonument, Pretoria, skryf:
Ek wil besoekers aan die Voortrekkermonument in Pretoria verseker dat die bestuur die uitsonderlike voorval op Dinsdag 8 Oktober waar ’n mislukte motorkaping by Fonteinedal tot ’n rooftog by die ikoniese Voortrekkermonument gelei het, in ’n baie ernstige lig beskou.
Alle moontlike maatreëls sal getref word om ons besoekers steeds veilig en welkom te laat voel.
Die misdadigers het tydens die aanval in die middernagtelike ure die venster van die hekkantoor gebreek en die kasregisters en rekenaarskerm gesteel. Geen kontant word snags in die hekkantoor of ander kantore op die terrein van die Voortrekkermonument gehou nie.
Volgens die hekwag was die mans nie Suid-Afrikaanse burgers nie. Ons dank aan die polisie wat bykans onmiddellik op die terrein was. Ten spyte van die feit dat die rowers die kamera by die hek vernietig het, kon die polisie duidelike foto’s van die drie rowers aflaai.
Die hekwag is nie in die voorval beseer nie.
Die Voortrekkermonument gaan reeds weer voort met normale sake-ure en besoekers word herinner om van die alternatiewe hekkantoor gebruik te maak.
Ons sien daarna uit om u te verwelkom.
