Gladys van der Merwe, Bela-Bela, skryf:
As inwoner van Warmbad Rusoord wil ek graag namens myself en die ander inwoners van dié tehuis vir bejaardes aan Ann van Blerk en haar personeel baie dankie sê vir ’n heerlike familiedag wat op Saterdag 7 September gehou is.
Die ete wat voorgesit is, was nie net heerlik nie, maar die tafels was keurig gedek en geen moeite is ontsien nie. Ons geliefdes is gasvry ontvang en onthaal. Dankie vir baie harde werk wat bo en behalwe julle gewone dagtake gekom het.
Ons wil ook dankie sê vir die tuiste wat julle vir ons skep. Ons kan in ons goue jare gelukkig en tevrede wees met die kosbare versorging wat ons daagliks ontvang.
Ons waardeer elkeen se harde werk en ons wil julle graag die seën van die Here toebid.