Werkloosheid ’n ongeneesbare wond
Die president erken dat die werkloosheidsprobleem die grootste bedreiging is wat Suid-Afrika tans in die gesig staar, maar die ANC-regering dring daarop aan om voort te beur op die selfvernietigende pad wat hy deur middel van sy ondeurdagte en selfdienende beleid geskep het.
Heloïse Jordaan, Vryheidsfront Plus LP en hoofwoordvoerder: Openbare dienste en administrasie, skryf:
Die sogenaamde intervensies om werkloosheid in Suid-Afrika te verlig, waarna pres. Cyril Ramaphosa gedurende ’n parlementêre vraag-en-antwoordsessie verwys het, sal nie werk onder huidige ANC-beleidsrigtings nie.
Die president erken dat die werkloosheidsprobleem die grootste bedreiging is wat Suid-Afrika tans in die gesig staar, maar die ANC-regering dring daarop aan om voort te beur op die selfvernietigende pad wat hy deur middel van sy ondeurdagte en selfdienende beleid geskep het.
Die president wil beleggersvertroue bevorder, maar sy regering dring daarop aan om privaat eiendomsreg in die gedrang te bring.
Voorts verwag die regering van die privaat sektor om werkskepping te stimuleer, maar beperkende en voorskriftelike arbeidswetgewing kortwiek juis die privaat sektor om hieraan te voldoen.
Swart Ekonomiese Bemagtiging (SEB) en Regstellende Aksie (RA) is enkele voorbeelde van staatsinmenging wat werkskepping deur die privaat sektor in die wiele ry.
Intervensies waarop die regering eerder moet fokus, is die verslapping van voorskriftelike arbeidswetgewing en oorregulering, ’n omkeerstrategie vir plaaslike regering om dienslewering reg te ruk en die doeltreffende bestryding van korrupsie en diefstal deur kaderontplooiing stop te sit.
Die president is korrek, werkloosheid is ’n nasionale krisis met skrikwekkende afmetings. Dit is egter ’n krisis wat deur sy eie regering veroorsaak is en bevorder word en sal nie omgekeer word onder dieselfde regering nie.