Pieter Wagner, Bela-Bela, skryf:
Simon Malebane (61), ’n boer van Radium wat die afgelope week wreed op sy plaas vermoor is, was van jongs af deel van die Bela-Bela-gemeenskap.
Hy het in Settlers skool gegaan.
Hy het deur harde werk en genade van Bo in die sakewêreld uitgestyg. Hy was ’n kliënt van ons en later het ons vriende geword. Ons kan baie lesse uit sy lewenswyse leer. Hy was nederig, vriendelik en mensliewend. Hy het gereeld Saterdae by die veilings goedere gekoop wat hy onder armes uitgedeel het.
Ons het ’n groot gees in Bela-Bela verloor. Ons weet nog nie hoe en waarom nie, maar die implikasies strek veel verder as wat oënskynlik lyk. Hy was ’n werkgewer by uitstek, die versorger van baie gesinne, ’n landbouer wat tot die voedselvoorsiening in ons land bygedra het en ’n geliefde gesinsman. Wie gaan sy plek vol staan? Die werklikheid is dat ’n landbouer uit die samelewing verwyder is.
Een van sy plaaswerkers, Daniel Ngoagamobe (59), is saam met hom vermoor.
Ons land is vuisvoos vir dié soort geweldsmisdaad. Bela-Bela was tot ’n paar jaar gelede redelik vry van ernstige misdaad, maar ons is tans een van die minder veilige dorpe om in te woon en misdaad ruk handuit. Indien plaasaanvalle soos dié waarin Malebane en sy werker gesterf het, toeneem, kan ons hele gemeenskap in duie stort. Ons sou graag ’n teenvoeter wil hê om misdaad te bekamp.
Die polisie en hul medewerkers doen hul bes, maar as die harte van die mense nie verander nie, sal niks verbeter nie. Dit is asof die duiwel ons bloots ry.
Kom ons dra die polisie en medewerkers aan die Here op en vra dat hulle deur Sy genade hierdie misdaadoorlog sal wen. (Brief verkort. — Red.)
