Heloïse Jordaan, Vryheidsfront Plus (VF-Plus) -LP en hoofwoordvoerder: Arbeid en werkskepping, skryf:
Die toename in werkloosheid van 27,6% in die eerste kwartaal na 29% in die tweede kwartaal is uiters sorgwekkend, maar hoegenaamd nie ’n verrassing nie.
Die werkloosheidkoers was in 2008 laas 29% met die hoogste koers tot op hede van 29,3% wat in Maart 2003 gemeet is.
Inaggenome mense wat reeds moed opgegee het om werk te vind, is daar tans na raming 10 miljoen werkloses in Suid-Afrika te midde van ’n styging in die bevolking na 58 miljoen mense.
Suid-Afrika sit op ’n tydbom wat werkloosheid betref en het ’n welsynstaat geword met sowat 17 miljoen mense wat van maatskaplike toelaes afhanklik is. Dit is meer as die aantal werkende mense in die land. Dié onvolhoubare situasie is deur die ANC-regering geskep.
Ondeurdagte beleidsrigtings en ’n algehele gebrek aan politieke wilskrag veroorsaak dat al hoe meer mense hul werk verloor en van die regering afhanklik word.
Die privaat sektor word doodgesmoor deur striemende arbeidswetgewing en oormonitering deur die regering. Swart Ekonomiese Bemagtiging, regstellende aksie en ander voorskriftelike wetgewing kom neer op regeringsinmenging en verhinder die privaat sektor om werkskepping te bevorder.
Die grootste verliese sluit onder meer 44 000 professionele poste en 19 000 huishoudelike werkers in. Dit is nie verbasend nie aangesien die minimumloon, tesame met die verswakte ekonomie, dit onbekostigbaar maak vir baie middelklashuishoudings om werknemers in diens te hou.
Daar is ’n reusewanbalans tussen beskikbare vaardighede en die vereistes in die arbeidsmark. Skolastiese en tersiêre opleidingsuitsette voldoen nie meer aan die verlangde vereistes nie wat potensiële kandidate nie aan die kriteria van poste laat voldoen nie. Dit kan vierkantig voor die deur van die regering gelê word, omdat die algemene standaard van alles tot ’n onaanvaarbare lae vlak gedaal het.
Niks waaraan die ANC-regering die afgelope 25 jaar geraak het, het nie ’n omkeerstrategie nodig nie. Die enorme probleem van werkloosheid in Suid-Afrika sal egter nie omgekeer kan word terwyl die ANC die regerende party is nie.
