Karel Niewenhuis, adjunk- provinsiale leier, Vryheidsfront Plus, skryf:
Julius Malema het tydens die EFF se verjaardagviering die laaste spyker in die doodskis van versoening geslaan.
Johann Rupert, ongeveer R70 biljoen sterk, het onlangs laat blyk hy oorweeg om die land te verlaat. Dit was die groenlig vir Malema se uitspraak: “As jy wil voetsek, voetsek.” Die spreekwoordelike kersie op die onvergenoeglike koek, is die dreigement om Rupert se eiendom, die eksklusiewe Leopard Creek-gholflandgoed, aan te val.
Pravin Gordhan is eweneens in die EFF se visier. Net so aanstootlik is Zindzi Mandela, niks minder as Suid-Afrika se ambassadeur in Denemarke nie, se verwysing na blankes as verkragter-afstammelinge van Jan Van Riebeeck.
Ons word tydig en ontydig aan oudpres. Nelson Mandela se nalatenskap herinner. Mandela se slagspreuk was immers versoening en ’n land waar almal ’n plek onder die son het. Vandaar die woord versoening in die Waarheid- en Versoeningskommissie. Die begrip is tydens oudpres. Thabo Mbeki se presidentskap afgewater deurdat hy versoening onderhewig aan transformasie gestel het.
In die gees van pres. Cyril Ramaphosa se nuwe dagbreek sou ’n mens verwag dat die ANC beswaar sal maak teen onsmaaklike uitsprake soos dié ten opsigte van Rupert. Die teenoorgestelde is waar: Geen woord word oor hierdie opstokery gerep nie; die gans wat die goue eiers lê, het vyand nommer een geword.
Die ANC is veronderstel om nie-rassig te wees. Hulle bepleit eenheid, maar ignoreer Pieter Groenewald se pleidooi om erkenning aan plaasmoorde te gee. Kommentators verwys al minder na versoening omdat dit na ’n onmoontlikheid begin lyk.
Haat en onverdraagsaamheid het die plek van die strewe na versoening ingeneem. Mense kan nie gedwing word om te versoen nie en rassistiese, opswepende uitsprake maak geen geringe bydrae om die water waarin die padda gegooi is, tot kookpunt te laat styg nie. So word daar lukraak na blankes as onwelkome besoekers en gronddiewe verwys. Die enigste strooihalms is instellings soos die howe en die Menseregtekommissie. Laasgenoemde raak egter die spoor byster toe Malema se uitspraak dat blankes “nie nou reeds” uitgemoor word nie, nie op haatspraak neerkom nie.
