Karel Niewenhuis, adjunk- provinsiale leier, Vryheidsfront Plus, skryf:
Die onbevredigende situasie by die verkeersdepartement in Modimolle het ondanks verskeie versoeke nie verbeter nie.
Sigbare verkeerswetstoepassing is steeds ’n probleem. Beamptes ontvang ’n maandelikse toelaag wat vir patrolliediens aangewend moet word. Hierdie toelae word vir persoonlike doeleindes gebruik, asook die koop van motorvoertuie. Laasgenoemde is in ’n prysklas onbekostigbaar vir diegene met ’n markverwante salaris. Goedkoper patrollievoertuie, duidelik gemerk, moet hierdie praktyk summier vervang. Die bystandtoelaag wat verkeersbeamptes ontvang, kan eweneens bevraagteken word.
Die moontlikheid bestaan dat motorryers onskuldig beboet word omdat die spoedmeterapparaat nie, soos bepaal deur verkeerswetgewing, geyk is nie. Dieselfde geld vir die remtoetsapparaat by die Modimolle-toetsstasie.
Die VF-Plus het ook verskeie klagtes ontvang van taxi’s wat in Thabo Mbekistraat in die middel van die pad passasiers op- en aflaai en sodoende padgebruikers in gevaar stel. Daarby het taxi’s in dieselfde straat hulle onregmatig staanplek toegeëien. In geen geval het die verkeersdepartement opgetree nie.
Die administrasie laat ook veel te wense oor. Uit ’n steekproef, deur die VF-Plus gedoen, het geblyk dat daar weinig aandag gegee is aan dagvaardings wat vir ’n tydperk van 12 maande vir verkeersoortredings uitgereik is. Dieselfde geld vir onwillige en onprofessionele optrede van amptenare in die lisensiekantoor. Lede van die publiek word nie hoflik op die oponthoud in die uitreik van lisensies gewys nie. Klagtes word veral van bejaardes ontvang wat soms maande moet wag vir die uitreik van ’n bestuurslisensie.
Die politieke wil ontbreek by die voorsitter van die gemeenskapdienste se portefeuljekomitee om teen die bestuur van die verkeersdepartement op te tree. Ooglopend dra die agbare lid nie kennis van die werkverrigting van ’n verkeersdepartement nie. Aansluitend hierby vind aanstellings van amptenare in toesighoudende hoedanigheid nie altyd op meriete plaas nie.
Die VF-Plus beskik tans slegs oor die voorsitterskap van die finansiële oorsigkomitee. Indien die VF-Plus se inset vergroot word, sal dit ’n aansienlike verskil maak in die bestuur van onder meer die verkeersdepartement. Die aangeleentheid is reeds met die VF-Plus se verteenwoordiger by die provinsiale wetgewer bespreek. Daar word in vooruitsig gestel om die saak met die premier op te neem.
Ek verwelkom enige navrae of klagtes met betrekking tot bostaande. My selfoonnommers is tel. 063 088 7188 of tel. 079 194 4126.
