Dr. Pieter Groenewald, Vryheidsfront Plus-leier, skryf:
Die vlaag gewelddadige plaasaanvalle en moorde in Suid-Afrika sedert die verkiesing vroeër vandeesmaand, is uiters sorgwekkend en dien as bewys dat daar ’n dringende behoefte is aan spesialis-eenhede soos die vorige moord-en roofeenheid of ’n eenheid teen plaasaanvalle.
Die VF Plus is bekommerd oor die wreedheid van sommige van die aanvalle en is teleurgesteld dat pres. Cyril Ramaphosa hom nie sterker teen misdaad uitgespreek het tydens sy inhuldigingsrede die afgelope Saterdag nie.
In die jongste voorval is twee jong mense helder oordag in Benoni vermoor nadat hul voertuig sonder brandstof gaan staan het.
Die 19-jarige Johanco Fleischman en sy vriendin, Jessica Kuhn (21), is oënskynlik sonder rede doodgeskiet. Sover bekend word net ’n selfoon vermis. Dit mag nie die doodstraf in Suid-Afrika beteken om bloot sonder brandstof langs die pad te gaan staan nie.
Verlede Maandag is Annette Kennealy (50), ʼn bekende kampvegter teen plaasmoorde, op haar hoewe buite Makhado met ʼn ysterpyp en hamer doodgeslaan. ’n Man wat glo jare by haar gewerk het, is in hegtenis geneem.
Twee weke gelede is Tool Wessels (55) en sy vrou, Liezel, wreed gemartel voordat hy vermoor is. Luidens mediaberigte is ’n 19-jarige burger van Lesotho in hegtenis geneem en drie ander mense is voortvlugtig.
Volgens AfriForum was daar in die laaste weke verskeie ander plaasaanvalle in die Boland waar dié soort misdaad voorheen ongekend was.
Die VF Plus wil hom ten sterkste uitspreek teen hierdie voorvalle en teen elke ander voorval van misdaad en geweld in Suid-Afrika, veral waar mense vermoor of beseer word. Die party wil ook sy meegevoel uitspreek teenoor die naasbestaandes van misdaadslagoffers.
Geweldsmisdaad in Suid-Afrika het té algemeen geword en bedreig die vrede, stabiliteit en menseverhoudings in die land. Die VF Plus sal hom toenemend daarvoor beywer om druk op die regering te plaas om daadwerklik en met erns teen misdaad op te tree.
