Altesame 21 sprekers het mekaar op Dinsdag 1 Maart die stryd aangesê.
Die Afrikaanse Taal en Kultuurvereniging (ATKV) het vanjaar hul aantal deelnemers per skool verhoog in ’n poging om deelname ’n hupstoot te gee.
”Ons is opgewonde daaroor en ons skud ons praatvere reg vir 5 en 6 Mei wanneer die Limpopo-Suid-uitdunronde by die Hansies plaasvind,” het Johanette Pretorius, organiseerder van die redenaars, aan Die Pos gesê.
Altesame 13 van die senior sprekers het deelgeneem aan die voorbereide toesprake.
Danielle Rentroia, vanjaar se hoofmeisie by die Hansies, was die wenner in die kategorie.
Dané Cornelius was kort op haar hakke in die tweede plek en Zander Law was derde.
Marnus Law het met die louere weggestap by die juniors se voorbereide toesprake met Reuben van der Wal tweede en Tiffany van der Merwe in die derde plek. Caitlyn Hunter was die wenner van die seniors se onvoorbereide toesprake. Isebelle de Beer was tweede en Nicola Strauss derde.
Die sprekers in die Eerste Addisionele Taal-kategorie het hul bedrewenheid in Afrikaans gewys. Alannah Cawood het die eersteplek as senior spreker losgepraat.
Hennie de Vos was die junior wenner in die onvoorbereide-afdeling.
“Dit was duidelik dat leerders uitgehonger is om hul sê te sê,” het Pretorius na afloop van die redenaarskompetisie gesê.
