Die Kleinmagetryn-kleuterskool in Modimolle het vanjaar ’n groentetuin-projek geloods waar al die gr. RR- en R-leerders die geleentheid gekry het om hul eie groente te plant. Die tamatie-, wortel-, blaarslaai-, komkommer- en spinasiesaad is geplant en word daagliks met groot sorg natgelei. Melani Smith (onderwyser) het aan Die Pos vertel dat die kinders nou self kan sien wat die proses vir die verbouing van groente behels voordat dit op die winkelrakke verskyn. Goeie eetgewoontes en gesonde kos is deel van die tema wat vandeesweek in die klasse behandel word. Op die foto is die klein handjies vlytig aan die werskaf in hul eie “beddings”.
Hoërskool Nylstroom het verlede week hul meriete-geleentheid wat einde verlede jaar weens die Covid-19-maatreëls uitgestel moes word, aangebied. Die gr.8-groep van 2021 is op Dinsdag 1 Februarie aangekondig terwyl die gr. 9-groep op Woensdag 2 Februarie vereer is. Die gr.10- en gr.11-groepe se merietegeleentheid is onderskeidelik op Donderdag 3 Februarie en Vrydag 4 Februarie in die skoolsaal gehou. Elke graadgroep kon die geleentheid saam met hul ouers bywoon. Op die foto is die graadwenners: Mia Kirsten (gr. 10), Zanellé Janse van Rensburg (gr. 8), Khomotso Selema (gr. 11) en Altus du Plessis (gr. 9).Altus Roos is een van Hoërskool Nylstroom se gr. 8’s wat op Maandag 31 Januarie as volwaardige Nylie verwelkom is tydens hul klokseremonie waar hulle ook hul skooldasse ontvang het. Die seremonie is verlede jaar vir die eerste keer gehou toe die matriekleerders die klok op hul laaste skooldag gelui het om hul skooldae vaarwel toe te roep. Hierdie is die eerste gr. 8-groep wat op hierdie wyse verwelkom is. Hulle sal ook weer die klok op hul laaste skooldag lui.
