Ma, vrou, suster en tannie gegroet
Wanneer sy kinders om haar gehad het, het sy gefloreer. En sy het áltyd kinders om haar gehad.
Belinda Smit van Modimolle se gesin het op Saterdag 6 Mei afskeid van haar geneem. Sy is in die Wilgers-hospitaal in Pretoria oorlede ná ’n kort sterfbed.
Haar man, Ben, onthou haar met die jong klomp altyd om haar.
“Sy het 22 jaar gelede Babbelbekkie-dagsorg oopgemaak wat na babas en kinders tot drie jaar oud omgesien het. Ná 14 jaar het sy die dagsorgsentrum toegemaak en ’n naskoolsentrum gehad waar sy kinders gehelp het wat sukkel, veral as hulle Engelssprekend was en in Afrikaans moes skoolgaan,” het hy vertel.
Die Smit-egpaar het ook verskeie kinders in pleegsorg geneem.
Belinda is in 2017 met borskanker gedagiagnoseer. Haar suster, Denise du Toit, is in 2018 aan dieselfde kanker oorlede.
“Ek het afgetree as gesondheidsinspekteur om meer tyd saam met haar deur te bring. Ons het darem ses maande gehad om die tyd saam te geniet,” het Ben gesê. “Ons het mekaar 40 jaar lank geken. Ons het ’n goeie lewe saam gehad wat die afskeid nog moeiliker maak. Sy het deur haar pyn nooit gekla nie.”
Belinda se troosdiens is op Vrydag 19 Mei gehou. Sy laat haar man, Ben, haar volwasse dogters, Bonita en Benanta Smit en haar kinders Janele van Wyk (16) en Hanno Smit (11), kleinseun Jeandro Christie, mas Hester van Vollenhoven en susters Charmaine Jennings en Adele Louw agter.
