Inwoners van Modimolle weet van die pragtige Clivianna-bosleliekwekery by ’n woonhuis in Kerkstraat. Dit is daar waar Ans Jacobs die afgelope 40 jaar reeds boslelies in elke kleur en vorm kweek. Jacobs het ook baie jare met boslelies geskou. Op die foto is een van haar kampioenboslelies met ’n enorme blommekroon in die voorgrond. Sy het aan Die Pos vertel dat dit baie geduld verg om boslelies te kweek en nuwe kleure deur middel van kruisbestuiwing te kweek. “Ek staan elke jaar in verwondering oor die Here se kleurvolle skepping wat ons oordadig seën met die mooiste blomme,” het sy gesê. Daar het oor die jare ook ’n wye verskeidenheid vetplante, bonsaiboompies en ander inheemse blomplante bygekom. Gaan loer gerus in om te deel in die vrolike blommeprag. Belangstellendes kan vir Jacobs bel by tel. 082 372 0765.
Sodra die bauhiniabome uitgedos staan in hul oordadige pienk en wit blomme, weet Waterbergers die lente is op pad. Hierdie bome wat orals langs die strate in Modimolle geplant is, staan ook bekend as die orgideëboom weens die pragtige blomme wat ’n mens laat dink aan eksotiese orgideë. Foto: Sarita Kriek-VoslooDie Kankervereniging van Suid-Afrika (Kansa) se Waterberg-tak het op Vrydag 12 Augustus ’n gesellige potjiekosaand by die Negester-aftreeoord net buite Bela-Bela gehou. Daar is heerlik gekuier terwyl almal hul eie potjiekos kon gaarmaak. Kansa Waterberg is baie dankbaar vir die borge wat die geleentheid moontlik gemaak het. Belanstellendes kan vir Anneke Ellis bel by tel. 063 696 1719 om by Kansa betrokke te raak.
