Marlene Jonker het saam met haar ma, Lena Bisschoff, op Sondag 8 Mei aangesit vir ’n heerlike Moedersdagmiddagete by die Abraham Koffiehuis. Die koffiehuis het sy deure in Desember 2021 by die Abraham Kriel-kinderhuis in Modimolle geopen en bied heerlike ligte etes en drinkgoed. Die koffiehuis spog ook met ’n professionele koffiemasjien wat voortreflike koppies boeretroos brou. Die omheinde kleuterswembad en speelterrein maak dit die ideale plek vir kinderpartytjies maar kan ook enige ander spesiale geleenthede aanbied. Die koffiehuis is oop op Vrydae tussen 15:00 - 19:00, Saterdae tussen 09:00 - 15:00 en Sondae tussen 10:00 - 15:00. Skakel gerus vir Gerda van der Merwe by tel. 082 410 2635 of vir Annie by tel. (014) 717 5264 gedurende kantoorure.
Die Modimolle-Mookgophong-munisipaliteit het op Woensdag 4 Mei altesame 27 woonerwe oorkant Bosveldsig Fase 1-3 in Modimolle tydens ’n vendusie opgeveil. Die erwe wissel tussen 1 000 en 1 500 m² en is deur verskeie mense vir ’n totale koopsom van R 2,8 miljoen gekoop. Volgens munisipale wetgewing kan enige koper binne sewe dae ’n hoër aanbod aan die munisipaliteit maak. Volgens Marlene van Staden, burgemeester, is die verkoop van hierdie erwe ’n goeie finansiële hupstoot vir die owerheid en word daar in die toekoms nog woonerwe vir ontwikkelings beplan.’n Uitgebreide projek om slaggate in die Bela-Bela-omgewing te herstel (bo en onder) het op Saterdag 7 Mei plaasgevind. Lede van AfriForum se Warmbad-tak het met 4,1 ton teer die slaggate om skole en in sekere strate herstel. Inwoners en lede van die Eersbewoond-buurtwag het, in samewerking met André Kock en Seuns veilingshuis, 15 ton teer vir dié pad bewillig. Pieter van Heerden, sakeman, het bykomende teer beskikbaar gestel om die toestand van die R101-pad na Radium te verbeter. Ander projekte om slaggate te herstel, duur steeds voort. Op die foto’s is lede van AfriForum en van die Eersbewoond-buurtwag besig om slaggate te herstel.
