Inwoners van die Noodhulp-omgewing buite Bela-Bela se gereelde watertekort is dalk eersdaags iets van die verlede danksy die DA en ’n groep privaat sakelui. ’n Waterpunt wat gekoppel is aan ’n standhoudende boorgat is aan die oorkant van Peet se Padstal op die R516-pad opgerig. Inwoners kan voorlopig daar water skep teen 10 c per liter. Die fooi is om die grondeienaar se kragrekening vir die gebruik van die pomp te help vereffen. Inwoners kan by Peet se Padstal aanklop om toegang tot die water te kry. Die inwoners wat saamgestaan het om dié plan te maak, is Tinus Ras, DA-raadslid, asook sakelui Leon Venter, Japie Cilliers, Johan Benadé, Chris Luüs, Valley de Souza en Peet en Hettie Pretorius. Op die foto word die water vir die eerste keer aan die publiek beskikbaar gestel terwyl rolspelers toekyk.
Die Vroue Landbou-unie se Mabalingwe-tak het op Dinsdag 13 April ’n besoek aan die Voortrekker Monument in Pretoria gebring. Op die foto is Denise Shaw en Kitty Bodenstein. Agter hulle staan Olive de Lange, Anneke Rautenbach en Meisie Furter. Die VLU moedig Waterberg-inwoners aan om hierdie kultuurhistoriese monument te besoek. Museums en ander geskiedkundige plekke trek noustrop ná die inperkings van die Covid-19-pandemie en maak nou meer as ooit tevore staat op ons bydraes om hierdie skatte vir die nageslag te bewaar.Inwoners van Bela-Bela het met hartseer verneem van die dood van Neville Haarhoff op Maandag 20 September. Hy het jare lank aan kanker gely en is in ’n Pretoriase hospitaal oorlede. ’n Woordvoerder van die Sondela-natuurreservaat het gesê Haarhoff was baie geliefd by die personeel van dié natuurreservaat waar hy die afgelope 22 jaar die finansiële bestuurder was. Hy het die respek van sy medewerkers, gemeenskap en sakevennote geniet en ’n reusebydrae gelewer tot die groei en ontwikkeling van die natuurreservaat en die geaffilieerde takke van die maatskappy. Hy word onthou as ’n man van integriteit en empatie en was altyd behulpsaam. Diegene wat deur sy vriendskap, leiding of mentorskap geraak is, sal hom ewig dankbaar wees vir die voorbeeld wat hy gestel het. “Sy Sondela-familie sal hom ontsettend mis.” Teen druktyd was daar nog geen begrafnisreëlings bekend nie.
