Aksie Opknap se tuinbouspan is weer ywerig aan die werk om Modimolle se openbare tuine mooi te maak danksy die geldelike hulp en ondersteuning van inwoners en sakelui van die dorp. Volgens Erna Human van Aksie Opknap is hulle opreg dankbaar vir Professional Risk Security Services (PRSS) in Modimolle wat elke maand bydra tot die lone van die drie permanente tuinwerkers. Op die foto is Human en Henna Nothnagel van Aksie Opknap by Martin van Blerk van PRSS. Die foto is geneem by een van die beddings op die plaaslike munisipaliteit se perseel wat in samewerking met Aksie Opknap geskep is en weekliks onderhou word. Inwoners wat betrokke wil raak by Aksie Opknap kan vir Human bel by tel. 082 348 6925 vir meer inligting.
’n Gedeelte van die openbare parkie op die hoek van Ludorf- en Reitzstraat in Bela-Bela is op Saterdag 28 Augustus glo kwaadwillig aan die brand gesteek. Die vlamme het gou die lang, droë gras verswelg. Geen skade is aan strukture, geboue of nabygeleë wonings aangerig nie. Die hulp van die RSRT-buurtwag, asook PRSS-veiligheidsmaatskappy, is ingeroep, maar teen druktyd was niemand aangekla nie. Die Pos skryf die afgelope jaar gereeld oor kwaaddoeners wat in dié parkie oornag, laatnag kuier en inwoners se vrede versteur. Inwoners wat wil kla oor onwettige bedrywighede by die parkie, kan die munisipaliteit skakel by tel. (014) 736 8000. Inwoners kan ook vir Martin van Blerk van PRSS bel by tel. 073 210 7032 of vir Gerhard Olivier, AfriForum-voorsitter en RSRT-bestuurslid, by tel. 079 527 9988.
