Kosie Botha (77) van Modimolle is op Dinsdag 26 Januarie in die FH Odendaal-hospitaal weens Covid-19-komplikasies oorlede. Botha was ’n jarelange lid van die Nylstroom-tuinbouvereniging. Sy vriendin, Kosie Basson, is nege dae voor sy dood oorlede. Botha was die enigste man wat deel was van die tuinbouvereniging en het graag sy kennis met ander gedeel. Hy was bekend vir die pragtige amarilla-plante, rose en irisse in sy tuin. Hy het kersietamaties in sy beddings geplant en graag die oes met mense gedeel. Botha het sy eie kompos gemaak en graag in sy tuin ingewerk. Hy het altyd gesê ’n komposmengsel is die sleutel tot sy suksesvolle tuin. Die datum van Botha se roudiens moet nog bekendgemaak word.
Die Bosveld-fotografieklub van Modimolle se tweede aanlynbyeenkoms word vir Dinsdag 9 Februarie om 18:15 beplan. Fotograwe wat belangstel kan vir Lizelle Koch bel by tel. 082 772 2006 of vir haar e-pos stuur na lizellekoch@gmail.com(.) Hannes Koch het tydens die eerste byeenkoms van 2021 die landskap-kategorie gewen met hierdie foto wat in die Karoo geneem is. Hy was ook die junior maandwenner.
