Almal soek na hoop, goeie nuus en positiewe mense
Daar was vanjaar genoeg slegte nuus. Mense is uitgehonger vir goeie nuus, goeie raad en mense wat positief is. Andries van der Heyde het by twee inwoners gaan inloer vir boodskappe van hoop.
![](https://images.caxton.co.za/wp-content/uploads/sites/134/2020/12/corlia-branders-780x470.jpg)
“Ons het vanjaar geleer as die lewe jou ’n suurlemoen gee, maak jy limonade of konfyt,” het Corlia Branders, berader van Bela-Bela, gesê.
“Daar is vanjaar gebottel, gebrou, gebak en gekook. Daar was die wynmakersgilde en aartappel-vodka-brigade — om van die pynappelbier-vriende nie eens te praat nie. Dit is amper soos die sluimerende rebel in ons wat besluit het:
“Vir my sal julle nie onderkry nie!”
Branders sê die bekende liedjie If I could save time in a bottle, kon netsowel herskryf geword het na Hope in a bottle.
Sy sê mense se optrede het haar vanjaar baie aan die spensrak herinner. “Marmelade se bitter skil kan met genoeg suiker in ’n gesogte lekkerny verander.
Die bitterbekke word soeter met lag en bid en nuwe vaardighede. Dan was daar die agurkies,” sê sy.
“Hulle was die suurknolletjies wat aanhoudend fopnuus gelees en versprei het.”
Gelukkig was daar ook die kerrieboontjie-mense. Dit is nou hulle wat buite die boks gedink het.
“Hulle is nie altyd gewild nie, maar in hul andersheid lê daar hoop.”
Heuning-mense was vanjaar haar gunsteling.
“Heuning het helende en antibakteriese eienskappe. Dit is ’n anti-oksidant wat vrye radikale neutraliseer en natuurlike genesing vir moeë siele bring.”
Heuning-mense leef na aan die aarde, sê sy.
“Wanneer jy moeg is en hoop wil verloor, mag jy opnuut besef dat daar hoop en genesing is in eenvoud, die natuur, Skepper en Sy skepping.
![](https://images.caxton.co.za/wp-content/uploads/sites/134/2020/12/kriek-800x600.jpg)
Ds. Theuns Kriek, leraar van die NG Gemeente Warmbad-Wes, sê dit is veral vir kinders ’n hoogtepunt om op Oukerskaand geskenke oop te maak.
“En kom ons erken dit maar — ons grootmense hou ook van geskenke.”
Volgens Kriek beteken Kersfees vir Christene gelukkig meer as geskenke.
“Seker die bekendste vers in die Bybel, Johannes 3:16, stel dit só mooi: God het die wêreld so lief gehad dat Hy Sy enigste Seun gegee het, sodat dié wat in Hom glo, nie verlore sal gaan nie maar die ewige lewe sal hê.”
Nog iets wat sinoniem met Kersfees is, is lig, sê hy. Strate, huise, Kersbome en winkelsentrum word pragtig versier met gekleurde liggies.
Daar staan nie verniet in Johannes 1:9 dat die Ware Lig wat elke mens verlig na die wêreld toe kom nie.
“Johannes gebruik dus twee beelde wat vir ons die betekenis van die koms van Jesus na die aarde verhelder: lig en ’n geskenk. Wat maak ons daarmee? Wandel ons in hierdie Lig en aanvaar ons hierdie Geskenk?”
Kriek sê sy gebed is dat almal opnuut en met dankbaarheid hierdie geskenk sal aanvaar.