Jagluiperdsentrum streef na die beste
Die Pos het die afgelope week die Cheetah Experience-rehabilitasiesentrum, ’n nie-winsgewende maatskappy, tussen Modimolle en Bela-Bela besoek en wat ’n aangename verrassing was dit nie.
![](https://images.caxton.co.za/wp-content/uploads/sites/134/2020/11/10a-780x470.jpg)
Die sentrum is in 2009 gestig en fokus daarop om roofdiere, veral jagluiperds, wat beseer is of gebrekke het, te rehabiliteer. Hul is ook betrokke by ’n wetenskaplikgegronde teelprogram wat die voortbestaan van dié spesie verseker.
Die rehabilitasiesentrum fokus ook op die bewusmaking van bewaring van ons land se natuurerfenis. Die diere word versorg en gerehabiliteer sodat hulle weer in bewaringsgebiede vrygelaat kan word. Die Waterberg is ’n gebied waar luiperds in die natuur voorkom.
Diere wat nie sodanig herstel om weer vrygelaat te word nie, word permanente inwoners op die plaas.
“Ons skenkings het opgedroog tydens die Covid-19-pandemie en ons moes self planne beraam om voldoende kos aan ons diere te verskaf,” het Riana Nieuwenhuizen, stigter van die sentrum, aan Die Pos gesê.
Hul grootste bron van ondersteuning het gekom van donasies uit die VSA en Europa, maar dié lande se ekonomie is ook swaar getref deur die pandemie en skenkings het al minder geword. Nieuwenhuizen het gesê al het hul uitdagings meer geword, sal hulle nie van hul roeping afsien om die rehabilitasieprogramme te laat voortgaan nie.
Die natuurlike balans moet in ewewig bly. Ander rehabilitasieprogramme vir ander spesies streef dieselfde doel na.
“Elke dier het ’n doel in die natuur. As mense hulle summier doodmaak, word die ewewig versteur en sal ’n ander groep diere in die voedselketting te veel word wat lei tot ’n kettingreaksie van wanbalans.”
Die bestuur het tydens die pandemie baie verbeteringe aangebring. Hulle het nuwe hokke gebou, personeel se woonkwartiere opgegradeer en ’n nuwe koelkamer vir die stoor van voedsel vir die katte is gebou.
“Ons het die afgelope jaar geen kosskenkings gekry nie, maar vleisverwerkers was ons goedgesind en het vir ons goeie pryse aangebied om vleis te koop,” het sy gesê. “Besoekers moet nooit onder die wanindruk wees dat ons diere soos troeteldiere gehuisves word nie. Hulle bly roofdiere en word as sulks gerespekteer. Wilde diere wat gerehabiliteer word, het steeds spasie nodig. Hulle instink om te jag moenie taan nie, want dit is belangrik dat hulle self kan jag wanneer hulle weer hervestig word. Mense wat hulle wil mak maak, moet myns insiens nie eens permitte bekom om roofdiere aan te hou nie.”
Sy het voorts gesê die sentrum bied nie interaksie met die diere aan nie, maar wil graag aan besoekers die geleentheid bied om die diere se gewoontes beter te leer ken. Besoekers is welkom om die rehabilitasiesentrum te besoek.
“Ons vrywilligers uit Europa kan nou volgens die vlak 1-inperking weer by die personeelkorps aansluit om op die reservaat te help,” het sy gesê. “Ons diere is veilig en ons veiligheidsisteem is ook opgegradeer. Die personeel woon naby die hokke om ’n oog te hou. Ons katte sal altyd net die beste kry. Hulle versorging is ons eerste prioriteit,” het sy gesê.
Waterbergers wat graag die rehabilitasiesentrum wil besoek, kan vir Riana Nieuwenhuizen bel by tel. 079 155 5917 om ’n afspraak te maak.