Boere stuur vragte voer Vrystaat toe
Altesame 13 vragmotors, swaar gelaai met voer, het op Donderdag 29 Oktober vanuit Modimolle vertrek op pad na die swartverbrande Vrystaat.
![](https://images.caxton.co.za/wp-content/uploads/sites/134/2020/11/16a-780x470.jpg)
Verwoestende brande het verlede week na raming sowat 130 000 ha weiding in die Wes-Vrystaat verwoes.
Dit sluit dorpe soos Hertzogville, Boshof, Hoopstad, Dealesville en Bultfontein in. Honderde diere moes van kant gemaak word nadat hulle beseer is in die brande.
Die sowat 500 lede van die Modimolle Brandbestrydingsvereniging (FPA) het besluit om hul hande diep in hul sakke te steek en voer te stuur aan die brandbestrydingsvereniging in Boshof.
“Daardie boere het ’n slegte jaar agter die blad,” het Willem Crause, operasionele brandbestuurder van die FPA, gesê. “Eers het snotsiekte onder hul diere uitgebreek en daarna het Covid-19 die land getref. Nou het die brande boonop groot skade veroorsaak.”
Boere in Modimolle het volgens Crause ’n goeie jaar sonder groot brande gehad.
“Ons het uitgereik en ons lede gevra of hulle wil help en hulle het dadelik ingespring en voer geskenk,” het hy gesê.
Benewens die 13 vragmotors wat die vrag op Vrydag 30 Oktober afgelaai het, is daar ook twee ton kos vir huishoudelike gebruik geskenk.
“Ons het met die hulp van die FPA in Boshof die voer by ’n vulstasie in Warrenton versprei. Dit was ’n hartseer dag. Van die boere wat vertel het hoe hulle deur die brande geraak is, het gehuil. Van hulle wat 10 000 ha gehad het, het net 1 000 ha oor wat nie gebrand het nie. Dit was baie emosioneel,” het Crause gesê.
Walter Doubell, voorsitter van die Modimolle FPA en die raad, wil graag elkeen van hul lede wat ingespring het om te help, van harte bedank.
“Ons sou graag elkeen wou noem. JP van Biljon van Vanderbijlpark het die vervoer van die vrag geskenk. Johan Croukamp en Willem van Biljon, albei van Modimolle, asook Waterberg Toyota, het ons baie gehelp om die vrag daar te kry,” het Crause gesê.
Die FPA beplan om nog ses vragte in die komende week Vrystaat toe te stuur.