Inwoners is keelvol vir haglike toestand van Reitzstraatparkie
Inwoners wat in die omgewing van die openbare parkie in Reitzstraat in Bela-Bela woon, is keelvol vir die argelose houding van die plaaslike owerhede oor die verval van die parkie.
Altesame 74 inwoners het reeds ’n petisie onderteken om die Bela-Bela munisipaliteit aan te spoor om dringend aandag aan die situasie te skenk.
Inwoners is bekommerd oor straatligte wat reeds geruime tyd buite werking is in die omgewing en sê die parkie word swak bestuur.
ADVERTENSIE / ADVERTISEMENT
Die groep is van mening dat dié houding misdaad in die omgewing laat floreer. Die Pos het reeds talle kere oor die toestand van die parkie berig. Inwoners in Driver-, Reitz, Ludorf-, Van Staden- en Robertsonstraat word die ergste geraak.
Die toiletgeriewe is in ’n haglike toestand en dit wil voorkom asof haweloses in die gebou oornag. Toegang tot die gebou word nie beperk nie. Die rommel in die parkie word reeds geruime tyd nie verwyder nie. Die Pos het al foto’s gepubliseer waar rondlopervee lustig tussen die vullis wei.
Die dam in die parkie is ook ’n bron van kommer. Inwoners kla dat die dam sleg ruik omdat mense dit as toilet gebruik. Daar is ook al kinders opgemerk wat sonder toesig in die dam swem. In die petisie, waarvan Die Pos ’n afskrif het, kla inwoners dat die donker omgewing gunstig vir boosdoeners is en dat die parkie ’n broeiplek vir dwelmhandelaars en prostitute geword het.
Daar word ook gereeld drank in die openbaar gebruik en daar is ’n gedurige lawaai, lui die petisie. Volgens die besorgde inwoners woon hawelose mense onwettig in die park, wat tot gevolg het dat belastingbetalers nie meer die vrymoedigheid het om met hul gesinne daar te gaan stap nie.
Inwoners is baie bekommerd dat die haglike toestand by die parkie hul eiendomme se waarde kan laat daal. Die groep eis dat die polisie gereeld patrollies na die parkie onderneem en onwettige inwoners en boosdoeners moet verwyder. Hulle eis ook dat die parkie teen sononder gesluit moet word en dat die geriewe onderhou moet word.
Die petisie is reeds by die munisipaliteit en by die polisiestasie afgegee en is deur die betrokke amptenare onderteken. Die munisipaliteit het antwoorde op Die Pos se navrae beloof, maar het teen druktyd nog geen terugvoer verskaf nie.
Baie dankie aan Pavecon sonder wie se hulp die plasing van dié aanlynberig nie moontlik sou wees nie.
