Inwoners woedend oor dierekarkasse in woonbuurt
Inwoners in die omgewing van die Basie Wessels-parkie, direk langs die NG Warmbad Wes-gemeente in Bela-Bela, was verstom toe ’n slegte reuk hulle na verskeie dooie dierekarkasse gelei het.
![](https://images.caxton.co.za/wp-content/uploads/sites/134/2020/09/2a-2-780x470.jpg)
Die Pos het die omgewing verlede week besoek en ’n dooie hond, dooie hoenders en ander velle en bene in die parkie opgemerk.
Een inwoner het beweer die dooie diere word bedags daar afgelaai. Hy het aan Die Pos gesê hy het foto’s van die betrokke voertuig wat karkasse daar afgelaai het.
ADVERTENSIE / ADVERTISEMENT
Inwoners van Bela-Bela kla sedert die begin van die grendeltydperk steen en been oor onwettige vullisstorting in die dorp en beskuldig ook die Bela-Bela-munisipaliteit dat hy nie sy huis hieroor in orde het nie.
David Raborolo, hoof van kommunikasie by die Bela-Bela-munisipaliteit, het by navraag aan Die Pos gesê dit is die munisipaliteit se plig om toe te sien dat inwoners in ’n gesonde omgewing woon.
“Inwoners het ’n grondwetlike reg om in ’n omgewing te woon wat nie gesondheidsgevare inhou nie. Daar is wetgewing wat onwettige stortings soos dié verbied,” het hy gesê.
Die munisipaliteit is egter volgens hom ook uiters bekommerd oor die aanhoudende voorvalle waar huishoudelike vullis onwettig gestort word, asook die toestand van die dorp se strate en openbare plekke wat vol rommel is.
“Dit skep ’n swak beeld van ons dorp.”
Raborolo het gesê daar is nuwe wetgewing in dié verband wat eersdaags in die Staatskoerant gepubliseer sal word en ingevolge waarvan mense groot boetes opgelê sal word indien hulle vullis op onwettige plekke stort, aflaai of laat aflaai.
Hy het gesê selfs mense wat ’n enkele stuk rommel op ’n ander plek as in ’n asblik gooi, staar boetes in die gesig.
Bepalings oor die verwydering van karkasse van dooie diere sal ook in dié beleid bekendgemaak word. Die munisipaliteit bly intussen steeds verantwoordelik om dooie diere in openbare plekke te verwyder.
“Die munisipaliteit versoek inwoners wat meer inligting het oor die onwettige storting van dierekarkasse om met Andrew Mohlala by die munisipaliteit in verbinding te tree.”
Raborolo het voorts gesê hy doen ’n beroep op inwoners om betrokke te raak by ’n langtermynherwinningsprojek wat moontlik later winsgewend kan word.
“Al is dit die munisipaliteit se taak om die dorp skoon te hou, is inwoners ook verantwoordelik daarvoor om nie rommel te strooi nie.”
Mohlala kan bereik word by tel. 082 555 4229 of stuur ’n e-pos aan Mohlalaa@belabela.gov.za(.) Hy is weeksdae van 07:30 tot 16:00 beskikbaar.
Baie dankie aan Pavecon sonder wie se hulp die plasing van dié aanlynberig nie moontlik sou wees nie.