Boere kry hupstoot om noodvoorraad op plase te lewer
Die landwye droogtetoestand, wat in Maart vanjaar as ’n nasionale ramp deur die regering verklaar is, is nog lank nie vir boere verby nie.
![](https://images.caxton.co.za/wp-content/uploads/sites/134/2020/09/14a.jpg)
Landbouhulporganisasies wat sukkelende boere landwyd van broodnodige hulpbronne voorsien, meen dit was ’n fout van die regering om die ramptoetand in Julie te herroep.
Die Oos-, Wes- en Noord-Kaap is sedert 2019 hard deur die voortslepende droogte getref.
Ander dele van die land het ook ’n baie swak reënseisoen gehad. Die droogte plaas verder druk op boere wat nie deel van groot korporatiewe organisasies is nie, maar as eienaarboere reeds geslagte lank onafhanklik boer.
“Die mense kry swaar en die natuur werk nie saam nie. Boere kry gereeld karkasse in die veld van diere wat weens die droogte gevrek het. Om nie eens te praat van die droë grond waar eens grasvelde was nie,” het Ronel Nell Steenkamp, organiseerder van Boere Hulp SA, aan Die Pos gesê.
Die organisasie het sedert 2016 ongeveer 4 000 ton se noodvoorraad — van veevoer tot kos vir sukkelende boere, hul gesinne en werkers — landwyd versprei. Steenkamp het gesê al is die verskillende hulporganisasies bereid om te help, het hulle baie uitdagings om te bowe te kom.
Die grootste hiervan is logistieke beperkings om by verafgeleë plase uit te kom. Daar was dus groot vreugde op Woensdag 26 Augustus toe Motus Isuzu in Isando twee trokke aan die organisasie geskenk het.
Steenkamp en haar span was in die wolke en sê hulle sal binnekort met 28 ton noodvoorraad vertrek om boere in die Noord-Kaap te ondersteun.
Bekendes soos Jacques Smalle, die DA se provinsiale leier, Marcelle Maritz, die Vryheidsfront-Plus se provinsiale leier, asook Henk van de Graaf, TLU SA se Noordstreek-voorsitter, het die oorhandiging van die trokke op ’n saamtrek buite Bela-Bela bygewoon. Hulle het aangedui dat hulle ook by dié projek betrokke sal raak.
“Mense verstaan nie hoe sleg die situasie vir boere in die skaapbedryf is nie. Van die boere en hul gesinne en werkers op die plase ly aan hongersnood.”
Sy het voorts gesê dit is wonderlik dat ons land se mense ruim bydra om die lot van hierdie boere te verbeter.
“Ons kry ongelooflike samewerking van mense met die koördinering en om boere wat in nood verkeer, uit te wys. Ons beskik ook oor al die nodige dokumentasie om as ’n wettige nie-winsgewende organisasie te kan werk. Ons fokus nie net op die Kaap nie, maar bied hulp regoor die land aan waar daar nood is.”
Met die reën wat nog skaars is en die vooruitsigte op vinnige verbetering maar min, vra Steenkamp mense wat bereid is om te help om haar te bel by tel. 064 529 7562.