Moenie ons land se vroue in landbou onderskat
Die rol van vroue in landbousake moenie onderskat word nie.
Vroue se positiewe en ondersteunende bydrae het vanjaar ’n groter krisis in landbou afgeweer. Só het Henk van de Graaf, TLU Noordstreek-voorsitter, aan Die Pos gesê oor vroue en hul volgehoue rol in die landboubedryf. Hy sê vroue moenie net in Augustus geëer word nie, maar elke dag van die jaar.
“Eerstens gee boervroue dikwels hul eie loopbane, die gerief van inkopiesentrums, die luukses van boetieks en besoeke aan teaters en kunsgalerye prys om diep in die platteland, waar stofpaaie die enigste verbinding met die naaste handelshuis is, te gaan woon,” het hy gesê. “Vroue en ma’s moet dikwels daagliks slegte paaie en gevare trotseer. Plaasvroue bring baie ure agter die stuurwiel deur as die amptelike karweier van kinders wat veilig by die skool en buitemuurse aktiwiteite moet uitkom of om dokumente, onderdele vir implemente of vars plaasprodukte moet aflewer. Dit is kosbare tyd wat ander vroue vir hulself kan gebruik.”
Van de Graaf sê dit is jammer dat vroue slagoffers word van plaasaanvalle.
“Dit is dikwels so dat plaasvroue hul mans bystaan met administrasie, boekhouding en bemarking. Gaan vra vir elke eerlike boer wat sy vrou vir hom beteken. Ook die vroue van plaaswerkers offer ontsettend baie op,” het hy gesê. “TLU SA haal sy hoed af vir die vroue in landbou. Hulle het ons voorgeslagte kaalvoet oor die berge gelei en is in die moderne tyd steeds van dieselfde stoffasie gemaak.”
Landbou gaan deur ’n ontsettende onseker tyd: die aanhoudende droogte, plaasbesettings, markte verdwyn weens die impak van Covid-19, restaurante se stowe staan koud, onsekerheid heers oor eiendomsreg en onteiening sonder vergoeding, die jagbedryf mag slegs binne provinsies opereer en agritoerisme kwyn. Van de Graaf skryf dit toe aan die beleidsonsekerheid wat die regering veroorsaak en die onregverdige toekenning van droogtehulp en ander hulpskemas aan sekere bevolkingsgroepe. Die gasvryheidsbedryf is ook sinoniem met landbou.
“Ons boere kan en wil boer en verwelkom beslis nie die ongevraagde en afbrekende inmengery van die regering nie. Die boere sal en kan voortgaan,” het hy gesê. “Die produsent en verbruiker moet direk met mekaar kan handel dryf sonder beperkende regulasies. Ons doen ’n beroep op mense om ons boere te ondersteun en boeremarkte tot stand te bring waar verbruikers hul voorraad direk van die landbouer teen billiker pryse kan bekom.”